وزیراعظم شہباز شریف کی فتنہ الہندوستان کے 22دہشتگردوں کو جہنم واصل کرنے پر سکیورٹی فورسز کے افسران و اہلکاروں کی پذیرائی

اسلام آباد۔( نمائندہ خصوصی):وزیراعظم محمد شہباز شریف نے شمالی وزیرِستان میں فتنہ الہندوستان کے خلاف کامیاب کارروائی پر سکیورٹی فورسز کے افسران و اہلکاروں کی پذیرائی کرتے ہوئے آپریشن میں 22 خارجیوں کو ہلاک کرنے پر سکیورٹی فورسز کے افسروں و اہلکاروں کی پیشہ وارانہ صلاحیتوں کو سراہا ہے۔وزیر اعظم آفس کے میڈیا ونگ کی طرف سے بدھ کو جاری بیان کے مطابق وزیراعظم نے کہا کہ معصوم شہریوں کو انسانی ڈھال کے طور پر استعمال کرتے ہوئے فرار کی کوشش کرنے کے ناپاک فعل میں ملوث دہشت گردوں نے ایک مرتبہ پھر سے ثابت کر دیا کہ ان کا انسانیت سے کوئی تعلق نہیں۔وزیراعظم نے کہا کہ دہشت گردی کے عفریت کے ملک سے مکمل خاتمے تک اس کے خلاف جنگ جاری رکھیں گے۔ انہوں نے کہا کہ ملک کو دہشت گردی کے ناسور سے پاک کرنے کے غیر متزلزل عزم میں مجھ سمیت پوری قوم افواج پاکستان کے ساتھ کھڑی ہے۔