وزیراعظم محمد شہباز شریف کا کمانڈ اینڈ سٹاف کالج کوئٹہ کا دورہ، ہر قسم کی مہم جوئی کے خلاف پاکستان کے خودمختاری اور علاقائی سالمیت کے دفاع کے عزم کا اعادہ

کوئٹہ(نمائندہ خصوصی):وزیر اعظم محمد شہباز شریف نے ہر قسم کی مہم جوئی کے خلاف پاکستان کی خودمختاری اور علاقائی سالمیت کے دفاع کے عزم کا اعادہ کرتے ہوئے قومی خودمختاری کے تحفظ اور ملک میں امن و استحکام کیلئے مسلح افواج کی پیشہ ورانہ صلاحیت، عملی تیاری اور قربانیوں کو سراہا ہے۔منگل کو وزیراعظم آفس کے میڈیا ونگ سے جاری بیان کے مطابق وزیراعظم محمد شہباز شریف نے کمانڈ اینڈ سٹاف کالج کوئٹہ کا دورہ کیا اور فیکلٹی و زیر تربیت افسران سے خطاب کیا۔وزیراعظم نے قومی خودمختاری کے تحفظ اور ملک میں امن و استحکام یقینی بنانے میں پاکستان کی مسلح افواج کی پیشہ ورانہ صلاحیت، عملی تیاری اور قربانیوں کو سراہا۔ انہوں نے شہدا کو خراج عقیدت پیش کرتے ہوئے مادر وطن کے دفاع کے لیے مسلح افواج کے غیر متزلزل عزم کو سلام پیش کیا۔وزیراعظم نے معرکہ حق کا حوالہ دیتے ہوئے فیلڈ مارشل سید عاصم منیر کی قیادت میں پاکستان کی مسلح افواج کی تاریخی کامیابی کو خراج تحسین پیش کیا۔انہوں نے بھارت کی بلااشتعال اور متکبرانہ جارحیت کے مقابلے میں پاکستان کے ذمہ دارانہ طرز عمل اور کشیدگی پر قابو رکھنے کی پالیسی کو سراہتے ہوئے کہا کہ پاکستان کے بالغ نظر، دانشمندانہ اور منصفانہ موقف کو عالمی برادری نے بھی تسلیم کیا۔وزیراعظم نے ہر قسم کی مہم جوئی کے خلاف پاکستان کے اپنی خودمختاری اور علاقائی سالمیت کے دفاع کے عزم کا اعادہ بھی کیا۔وزیراعظم نے کہا کہ آپریشن غضب للحق پوری قوت اور عزم کے ساتھ جاری ہے تاکہ افغان طالبان سے وابستہ دہشت گرد پراکسیز کے خلاف معصوم شہریوں کی جان و مال کا تحفظ یقینی بنایا جا سکے اور دہشت گردوں کے ٹھکانوں اور معاونت فراہم کرنے والے ڈھانچوں کو سخت سزا دی جا سکے۔ انہوں نے جموں و کشمیر اور فلسطین کے عوام کے لیے پاکستان کی غیر متزلزل حمایت کا بھی اعادہ کیا۔دوست ممالک کے طلبہ افسران کی موجودگی کو سراہتے ہوئے وزیراعظم نے عسکری سفارتکاری اور باہمی تعاون کی اہمیت پر زور دیا اور خطے اور اس سے باہر امن، استحکام اور ترقی کے فروغ کے لیے پاکستان کی جانب سے بطور نیٹ ریجنل سٹیبلائزر کیے گئے اقدامات کو اجاگر کیا۔ وزیر دفاع، وفاقی وزیر داخلہ اور وفاقی وزیر اطلاعات و نشریات کے علاوہ وزیراعلیٰ بلوچستان بھی وزیراعظم کے ہمراہ تھے۔ قبل ازیں کمانڈ اینڈ سٹاف کالج کوئٹہ پہنچنے پر چیف آف آرمی سٹاف و چیف آف ڈیفنس فورسز فیلڈ مارشل سید عاصم منیر نے وزیراعظم کا خیر مقدم کیا۔