اسلام آباد۔( نمائندہ خصوصی):ہلال احمر پاکستان نے ورلڈ ریڈ کراس اور ریڈ کریسنٹ ڈے کے موقع پر نیشنل ہیڈکوارٹر میں ’’انسانیت کے لئے متحد‘‘ کے عالمی تھیم کے تحت ہیومینیٹیرین فورم کا انعقاد کیا۔تقریب میں چیئرپرسن ہلال احمر پاکستان فرزانہ نائیک، اقوام متحدہ کے ریزیڈنٹ و ہیومینیٹیرین کوآرڈینیٹر برائے پاکستان محمد یحییٰ بطور مہمان خصوصی ، ہلال احمر پاکستان کے منیجنگ باڈی اراکین، صوبائی برانچوں کی قیادت، آئی سی آر سی، آئی ایف آر سی، جرمن ریڈ کراس، ناروے ریڈ کراس اور ترک ریڈ کریسنٹ کے نمائندگان سمیت مختلف قومی و بین الاقوامی اداروں، این ڈی ایم اے، پی ڈی ایم اے، این جی اوز اور اقوام متحدہ کے اداروں کے نمائندوں نے شرکت کی۔محمد یحییٰ نے ہلال احمر پاکستان کی خدمات کو سراہتے ہوئے رضاکاروں کی لگن اور قربانیوں کو خراج تحسین پیش کیا۔انہوں نے کہا کہ دنیا اس وقت موسمیاتی تبدیلی، قدرتی آفات، تنازعات اور مالی مشکلات کے باعث غیر معمولی انسانی چیلنجز کا سامنا کر 
رہی ہے جس کے باعث مضبوط شراکت داری، مقامی سطح پر استعداد اور بروقت اقدامات پہلے سے کہیں زیادہ اہم ہو گئے ہیں۔ انہوں نے پی آر سی ایس کو ’’لوکلائزیشن اِن ایکشن‘‘ کی بہترین مثال قرار دیتے ہوئے کہا کہ رضاکار ہنگامی حالات میں سب سے پہلے پہنچنے والے اور سب سے آخر میں واپس جانے والے ہوتے ہیں۔ چیئر پرسن فرزانہ نائیک نے اپنے خطاب میں پاکستان بھر میں کمزور طبقات کی مشکلات کم کرنے کے لئے ہلال احمر پاکستان کے اقدامات اور کمیونٹی بیسڈ پروگرامز پر روشنی ڈالی۔ ایشیا پیسیفک کے لئے آئی ایف آر سی کے ریجنل ڈائریکٹر الیگزینڈر میتھیو نے خصوصی ویڈیو پیغام میں دنیا کو درپیش بڑھتے ہوئے انسانی اور موسمیاتی چیلنجز کا ذکر کیا۔پاکستان میں آئی ایف آر سی کے ہیڈ آف ڈیلیگیشن آندریاس فان وائسن برگ ،پاکستان میں آئی سی آر سی کے ہیڈ آف ڈیلیگیشن کرسٹوف سٹر نے ہلال احمر پاکستان کے اشتراک سے جاری انسانی خدمات کو سراہتے ہوئے مشکل حالات میں خدمات انجام دینے والے رضاکاروں کی تعریف کی۔اس سے قبل ہلال احمر پاکستان کے سیکرٹری جنرل محمد عبیداللہ خان نے ’’ فرام ریسپانس ٹو ریزلینس ‘‘کے عنوان سے تفصیلی بریفنگ دی۔تقریب میں خصوصی ڈاکومنٹری بھی پیش کی گئی۔ مہمانان اعزاز، شراکت دار اداروں، صوبائی برانچوں اور نمایاں خدمات انجام دینے والے رضاکاروں میں یادگاری شیلڈز اور اعزازی تحائف بھی تقسیم کئے گئے۔اس موقع پر انسانی خدمت پر مبنی تصویری نمائش کا اہتمام بھی کیا گیا تھا۔
