بھارت کے ساتھ کشیدگی کےدوران عالمی سطح پرپاکستان کاذمہ داررویہ اوردوٹوک موقف

اسلام آباد۔(نمائندہ خصوصی):پاکستان نے بھارتی نام نہاد "آپریشن سندور” کابھرپورجواب دیا مگراشتعال انگیزی کے باوجود ذمہ دارانہ رویہ اپنایا۔ تفصیلات کے مطابق پاکستان بارہا بھارت کو ہرفورم پر کسی بھی قسم کی مہم جوئی اورجارحیت سے باز رہنے سےخبردارکرتا رہا۔ برطانیہ میں تعینات پاکستانی ہائی کمشنرڈاکٹر محمد فیصل نے معرکہ حق سے قبل بھارت کومتنبہ کرتے ہوئے کہاکہ فروری 2019 کی طرح پاکستان بھارتی جارحیت کا منہ توڑ جواب دینے کی بھرپور صلاحیت رکھتا ہے، اس بار بھی بھارت نے حملہ کیا تو پاکستان کی جانب سےمناسب جواب دیا جائے گا ۔ڈاکٹر محمد فیصل نے کہا کہ کشمیر ایک متنازعہ مسئلہ ہے جس کا یواین کی مداخلت یا باہمی معاہدوں کے تحت حل نکالنا ناگزیر ہے۔ امریکا میں تعینات پاکستانی سفیررضوان سعید شیخ نے بھی بھارت کوجارحیت سے باز رہنےکی سخت تنبیہ کی تھی۔ انہوں نے کہا کہ اگرپاکستان کی سرزمین پر حملہ ہوا توپاکستان اپنی پوری قوت سے بھارت کوجواب دے گا۔پاکستانی سفیر نے کہا کہ اگرایٹمی پڑوسیوں میں جنگ شروع ہوئی تو یہ کہاں تک جائے گی کوئی نہیں جانتا۔ماہرین کے مطابق پاکستان نے بھارتی اشتعال انگیزیوں کے باوجودخطے کو جنگی تباہی سے بچانے کیلئے ہمیشہ مذاکرات اور پُرامن تصفیے پر زوردیا ہے۔