چیئرمین سینیٹ سید یوسف رضا گیلانی سے قازقستان کے سفیر یرژان کستافین کی ملاقات، معاشی شراکت داری کے فروغ پر تبادلہ خیال

اسلام آباد۔(نمائندہ خصوصی):چیئرمین سینیٹ سید یوسف رضا گیلانی سے قازقستان کے سفیر یرژان کستافین نے پارلیمنٹ ہاؤس میں ملاقات کی، پاکستان اور قازقستان کے درمیان دوطرفہ تعلقات، پارلیمانی تعاون، علاقائی روابط اور معاشی شراکت داری کے فروغ پر تفصیلی تبادلۂ خیال کیا گیا۔سینیٹ سیکرٹریٹ کے مطابق چیئرمین سینیٹ نے کہا کہ پاکستان اور قازقستان کے تعلقات باہمی احترام، مشترکہ اقدار اور علاقائی ہم آہنگی پر مبنی ہیں۔ انہوں نے دونوں ممالک کے درمیان تعلقات کو مزید مضبوط بنانے کے عزم کا اعادہ کرتے ہوئے کہا کہ قازقستان کے صدر قاسم جومارت توقایف کا حالیہ دورۂ پاکستان دوطرفہ تعلقات میں ایک اہم سنگِ میل ثابت ہو گا۔چیئرمین سینیٹ سید یوسف رضا گیلانی نے سیاسی، پارلیمانی اور معاشی شعبوں میں تعاون کو مزید فروغ دینے کی ضرورت پر زور دیتے ہوئے کہا کہ پارلیمانی سفارتکاری کے فروغ اور دونوں ممالک کے فرینڈشپ گروپس کو مؤثر کردار ادا کرنا ہوگا۔انہوں نے دوطرفہ تجارت خصوصاً زرعی شعبے میں تعاون میں ہونے والی مثبت پیش رفت کو خوش آئند قرار دیا اور کہا کہ تجارت، سیاحت اور عوامی روابط کے فروغ کے لیے براہِ راست فضائی روابط ناگزیر ہیں۔ان کا کہنا تھا کہ علاقائی روابط کے فروغ اور منڈیوں تک رسائی کے لیے مشترکہ اقدامات وقت کی اہم ضرورت ہیں جبکہ پائیدار معاشی ترقی کے لیے علاقائی امن و استحکام انتہائی اہمیت کا حامل ہے۔اس موقع پر قازقستان کے سفیر یرژان کستافین نے مختلف شعبوں میں پاکستان کے ساتھ تعاون کو مزید وسعت دینے میں گہری دلچسپی کا اظہار کیا اور دونوں ممالک کے درمیان تعلقات کو نئی جہت دینے کے عزم کا اعادہ کیا۔