کراچی پورٹ پر 74 ہزار ٹن کارگو ہینڈل، 19 جہازوں کی آمد متوقع ہے، محمد جنید انوار چوہدری

اسلام آباد۔(نمائندہ خصوصی):وفاقی وزیر برائے بحری امور محمد جنید انوار چوہدری نے کراچی پورٹ ٹرسٹ کی مجموعی کارکردگی پر اطمینان کا اظہار کرتے ہوئے کہا ہے کہ بندرگاہ پر تجارتی سرگرمیاں تیزی سے جاری ہیں اور لاجسٹکس کا شعبہ مستحکم ہو رہا ہے۔وزارت بحری امور سے اتوار کو جاری بیان میں محمد جنید انوار چوہدری نے کہا کہ کراچی پورٹ پر 19 جہازوں کی آمد اور ایک جہاز کی روانگی شیڈول ہے جو وہاں مسلسل بحری سرگرمیوں کی عکاسی کرتی ہے۔انہوں نے کہا کہ گزشتہ 24 گھنٹوں کے دوران 74 ہزار 603 میٹرک ٹن کارگو ہینڈل کیا گیا جو بندرگاہ کی موثر کارکردگی کا ثبوت ہے۔ محمد جنید انوار چوہدری نے کہا کہ کنٹینرائزڈ کارگو سرِفہرست رہا جس کی مجموعی مقدار 45 ہزار 171 ٹن ریکارڈ کی گئی، اس میں 19 ہزار 303 ٹن درآمدات اور 25 ہزار 868 ٹن برآمدات شامل ہیں۔ اسی طرح بلک کارگو کی مقدار 11 ہزار 944 ٹن رہی جبکہ کلنکر کی برآمدات 6 ہزار 114 ٹن تک پہنچیں۔وزیر بحری امورنے کہا کہ مائع کارگو کی ہینڈلنگ بھی 10 ہزار 352 ٹن رہی جو توانائی سپلائی چین کی بہتری کی عکاسی کرتی ہے۔ان کے مطابق کراچی پورٹ پر اس وقت 14 جہاز لنگر انداز اور 7 جہاز روانہ ہوئے ، مختلف اشیاء کی ترسیل کا عمل جاری ہے۔انہوں نے کہا کہ جہازوں کی مسلسل آمد و رفت پاکستان کی سمندری تجارت میں بہتری اور معاشی سرگرمیوں کے فروغ کا واضح اشارہ ہے، کراچی پورٹ اس حوالے سے کلیدی کردار ادا کر رہی ہے۔