وفاقی وزیر قیصر احمد شیخ کا نوجوان پاکستانی کاروباری شخصیت صالح آصف کو عالمی کامیابی پر خراجِ تحسین

اسلام آباد( نمائندہ خصوصی):وفاقی وزیر برائے سرمایہ کاری بورڈ قیصر احمد شیخ نے نوجوان پاکستانی کاروباری شخصیت صالح آصف کی شاندار عالمی کامیابی کو سراہتے ہوئے اسے پاکستان کے لئے باعثِ فخر قرار دیا ہے۔اس پیشرفت پر اپنے خیالات کا اظہار کرتے ہوئے وفاقی وزیر نے کہا کہ 26 سالہ نوجوان جو کہ اے آئی سٹارٹ اپ کرسر (اینِی سفیئر) سے وابستہ ہیں، نے عالمی شہرت یافتہ کمپنی سپیس ایکس کے ساتھ ایک اہم معاہدہ کیا ہے جو ایلون مسک کی قیادت میں کام کر رہی ہے۔ اس کامیابی نے عالمی ٹیکنالوجی حلقوں میں پاکستان کا نام روشن کیا ہے۔وفاقی وزیر نے کہا کہ یہ کامیابی پاکستانی نوجوانوں کی بے پناہ صلاحیتوں کا منہ بولتا ثبوت ہے اور اس سے ظاہر ہوتا ہے کہ پاکستان جدت اور ٹیکنالوجی کے میدان میں تیزی سے آگے بڑھ رہا ہے۔ انہوں نے مزید کہا کہ اس طرح کی کامیابیاں ملک بھر کے نوجوانوں کے لئے مشعلِ راہ ہیں خصوصاً اُن افراد کے لئے جو مصنوعی ذہانت اور جدید ٹیکنالوجی کے شعبوں میں آگے بڑھنا چاہتے ہیں۔انہوں نے کہا کہ حکومتِ پاکستان سٹارٹ اپس کے فروغ اور سرمایہ کاری کے لئے سازگار ماحول فراہم کرنے کے لئے پُرعزم ہے۔اس طرح کی کامیابیاں ہمارے عزم کو مزید مضبوط کرتی ہیں کہ ہم جدت کو فروغ دیں، کاروبار میں آسانیاں پیدا کریں اور پاکستانی صلاحیتوں کو عالمی مواقع سے جوڑیں ۔انہوں نے مزید کہا کہ بورڈ آف انویسٹمنٹ ملک میں کاروباری سرگرمیوں کے فروغ، غیر ملکی سرمایہ کاری کے حصول اور پاکستان کو عالمی ڈیجیٹل معیشت میں ایک مضبوط مقام دلانے کے لئے مسلسل اقدامات کر رہا ہے۔ وفاقی وزیر نے نوجوان کاروباری شخصیت صالح آصف کو مبارکباد پیش کرتے ہوئے اس امید کا اظہار کیا کہ مزید پاکستانی نوجوان بھی اسی طرح عالمی سطح پر ملک کا نام روشن کریں گے۔بورڈ آف انویسٹمنٹ جدت کے فروغ، نوجوانوں کو بااختیار بنانے اور پاکستان کو عالمی سرمایہ کاری اور ٹیکنالوجی کا مرکز بنانے کے لئے پُرعزم ہے۔