لاہور ( خصوصی رپورٹ):سپیکرقومی اسمبلی سردار ایاز صادق نے اتوار کے روز پنجاب کی سینئر صوبائی وزیر مریم اورنگزیب سے ملاقات کی، جس میں صوبے کی ترقی، جاری منصوبوں اور پارلیمانی امور پر تبادلہ خیال کیا گیا۔ملاقات کے دوران سپیکر قومی اسمبلی نے وزیراعلی مریم نواز کی جانب سے صوبے کی ترقی کے لیے کی جانے والی کاوشوں کو 
سراہتے ہوئے کہا کہ پنجاب کی تاریخ میں پہلی بار ہر ضلع اور ہر حلقے میں مساوی بنیادوں پر ترقیاتی کام جاری ہیں۔انہوں نے کہا کہ عوام وزیراعلی مریم نواز کا شکریہ ادا کر رہے ہیں کہ انہوں نے 60 شہروں میں پنجاب ڈویلپمنٹ پروگرام کے تحت گزشتہ 70 سال کا سب سے بڑا ترقیاتی پروگرام شروع کیا۔انہوں نے مزید کہا کہ ستھرا پنجاب مہم کی نہ صرف صوبے بلکہ پورے ملک میں تعریف کی جا رہی ہے۔سپیکر قومی اسمبلی نے کہا کہ وزیراعلی مریم نواز صحت، تعلیم اور سیوریج کے بوسیدہ نظام کو جدید اور فعال نظام میں تبدیل کر رہی ہیں، جبکہ الیکٹرو گرین بسوں کا آغاز صوبے میں ایک نئے دور کا آغاز ہے۔ انہوں نے سموگ کے خاتمے اور پنجاب کو سرسبز بنانے کے اقدامات کو بھی قابل تحسین قرار دیا۔سردار ایاز صادق نے کہا کہ آئی ٹی، ماحولیات، زراعت اور معیشت سمیت ہر شعبے میں ہونے والی پیش رفت واضح طور پر نظر آ رہی ہے۔انہوں نے لاہور سے راولپنڈی تک تیز ترین ٹرین سروس کے منصوبے کے آغاز پر بھی وزیراعلی مریم نواز کو خراج تحسین پیش کیا۔اس موقع پر سینئر صوبائی وزیر مریم اورنگزیب نے سپیکر قومی اسمبلی کو پنجاب میں جاری ترقیاتی اقدامات کے بارے میں بریفنگ دی اور وزیراعلی مریم نواز کے اقدامات پر روشنی ڈالی۔انہوں نے قانون سازی اور پارلیمنٹ کے امور کے حوالے سے سپیکر قومی اسمبلی کی کارکردگی کو بھی سراہا۔
