وفاقی وزیرداخلہ محسن نقوی سے امریکی سفیر نیٹلی بیکر کی ملاقات، خطے کی تازہ ترین صورتحال پر تفصیلی تبادلہ خیال

اسلام آباد( نمائندہ خصوصی)وفاقی وزیرداخلہ محسن نقوی سے امریکی سفیر نیٹلی بیکر نے اہم ملاقات کی جس میں خطے کی تازہ ترین صورتحال پر تفصیلی تبادلہ خیال کیا گیا۔ ملاقات میں اسلام آباد مذاکرات کے دوسرے رائونڈ کے انعقاد کے حوالے سے سفارتی کاوشوں پر بھی بات چیت کی گئی۔وزیرداخلہ محسن نقوی نے جنگ بندی میں توسیع کے لیے امریکی صدر ڈونلڈ ٹرمپ کے اقدام کو سراہا۔ملاقات میں تنازعہ کے دیرپا حل کے سفارتی چینلز کے تسلسل کی ضرورت پر زور دیا گیا۔وزیر داخلہ محسن نقوی نے کہا کہ صدر ڈونلڈ ٹرمپ کی جانب سے جنگ بندی میں توسیع خوش آئند ہے اور یہ قدم کشیدگی میں کمی کی جانب اہم پیش رفت ہے اور ایران کی جانب سے بھی مثبت پیش رفت کی امید ہے۔ وفاقی وزیرداخلہ محسن نقوی نے کہا کہ وزیراعظم محمد شہباز شریف اور فیلڈ مارشل عاصم منیر مسئلے کے حل کیلئے ہر سطح پر بھرپور کوششیں کر رہے ہیں، امید ہے کہ فریقین سفارتی اور پر امن حل کو موقع دیں گے۔ نیٹلی بیکر نے خطے میں قیام امن اور تنازعہ کے حل کیلئے پاکستان کے تعمیری کردار کو سراہا۔