انطالیہ( نمائندہ خصوصی):وزیرِ اعظم محمد شہباز شریف اپنے دورہ ترکیہ پر انطالیہ پہنچ گئے۔ وزیر اعظم آفس کے میڈیا ونگ کی طرف سے جمعرات کو جاری بیان کے مطابق انطالیہ کے گورنر ہلوسی شاہین نے وزیراعظم و پاکستانی وفد کا ایئرپورٹ پر پرتپاک استقبال کیا۔ اس موقع پر پاکستان کے ترکیہ میں سفیر یوسف جنید اور اعلیٰ سفارتی اہلکار بھی موجود تھے۔ وزیر اعظم (کل )جمعہ کو پانچویں انطالیہ ڈپلومیسی فورم میں شرکت کریں گے۔ وزیر اعظم فورم میں پاکستان کا نقطہ نظر پیش کرنے کے
لئے "لیڈرز پینل” میں شرکت کریں گے۔ اس موقع پر ان کی ترکیہ کے صدر رجب طیب ایردوان اور دیگر اہم عالمی رہنماؤں سے دو طرفہ ملاقاتیں بھی متوقع ہیں۔ نائب وزیراعظم و وزیرِ خارجہ سینیٹر محمد اسحاق ڈار، وزیرِ اطلاعات و نشریات عطاء اللہ تارڑ، معاون خصوصی طارق فاطمی اور وزیرِ اعظم کے ترجمان برائے بین الاقوامی میڈیا مشرف زیدی پاکستانی وفد میں وزیراعظم کے ہمراہ ہیں۔
وزیرِ اعظم محمد شہباز شریف اپنے دورہ ترکیہ پر انطالیہ پہنچ گئے
