نائب وزیرِ اعظم سینیٹر محمد اسحاق ڈار کی برطانیہ کی وزیرِ خارجہ یوویٹ کوپر سے ٹیلیفون پر گفتگو

اسلام آباد۔( نمائندہ خصوصی):نائب وزیرِ اعظم و وزیرِ خارجہ سینیٹر محمد اسحاق ڈار نے برطانیہ کی وزیرِ خارجہ یوویٹ کوپر سے ٹیلیفون پر گفتگو کی۔دونوں رہنمائوں نے حال ہی میں اسلام آباد مذاکرات کے دوران ہونے والے براہِ راست امریکہ-ایران مذاکرات اور خطے کی مجموعی صورتحال پر تبادلہ خیال کیا۔ترجمان دفتر خارجہ کے مطابق برطانوی وزیرِ خارجہ نے خطے میں امن و استحکام کے فروغ کے لیے پاکستان کے تعمیری کردار کو سراہا،نائب وزیرِ اعظم/وزیرِ خارجہ نے اس بات پر زور دیا کہ تمام فریقین جنگ بندی کا مکمل احترام کریں اور اس پر عملدرآمد یقینی بنائیں۔ انہوں نے اس عزم کا اعادہ کیا کہ پاکستان علاقائی مسائل کے حل اور دیرپا امن کے قیام کے لیے مکالمے اور سفارت کاری کو واحد موثر ذریعہ سمجھتا ہے اور اسی راستے پر کاربند رہے گا۔