وزیر اعلیٰ پنجاب مریم نواز کے وژن کے تحت 327 ویں عالمی وساکھی میلے کی 9 روزہ تقریبات جاری گوردوارہ سری کیارہ صاحب کی بحالی کے میگا پراجیکٹ کا آغاز

لاہور ( نمائندہ خصوصی) وزیراعلیٰ پنجاب مریم نواز شریف کی خصوصی ہدایت پر 327 ویں عالمی وساکھی میلہ 2026 کی 9 روزہ تقریبات کا سلسلہ جاری ہے۔ اس سلسلے کے دوسرے روز ننکانہ صاحب میں ایک پروقار تقریب منعقد ہوئی، جس میں صوبائی وزیر برائے اقلیتی امور رمیش سنگھ اروڑہ نے گوردوارہ سری کیارہ صاحب کی بحالی اور تزئینِ نو کے اہم منصوبے کا سنگِ بنیاد رکھا۔اس موقع پر رمیش سنگھ اروڑہ نے کہا کہ وزیر اعلیٰ مریم نواز کے وژن کے مطابق پنجاب بھر میں 50 سے زائد گوردواروں کی بحالی کا کام جاری ہے۔ انہوں نے بتایا کہ 9 روزہ تقریبات کے دوران 8 ہزار سے زائد ملکی و غیر ملکی یاتریوں کے لیے قیام و طعام کے شاندار انتظامات کیے گئے ہیں۔ گوردوارہ سری کیارہ صاحب میں 40 کمروں پر مشتمل جدید رہائشی کمپلیکس کی تعمیر سے یاتریوں کو بین الاقوامی معیار کی سہولیات میسر آئیں گی۔انہوں نے مزید کہا کہ بھارت سے آئے 2238 سکھ یاتریوں سمیت تمام مہمانوں کو فول پروف سکیورٹی اور فری فیلڈ ہسپتال جیسی طبی سہولیات فراہم کی جا رہی ہیں۔ یاتریوں نے گوردوارہ جنم استھان، تمبو صاحب اور دیگر مقدس مقامات کی زیارت کی اور پاکستان میں ملنے والی محبت اور بہترین انتظامات پر وزیر اعلیٰ پنجاب کا شکریہ ادا کیا۔ تقریب میں ایڈیشنل سیکرٹری شرائنز ناصر مشتاق اور دنیا بھر سے آئے یاتریوں کی بڑی تعداد نے شرکت کی۔