اقوام متحدہ میں پاکستان کےسفیر سے امریکی طلبہ کی ملاقات ، عالمی و علاقائی مسائل اور عالمی ادارے میں تنظیمی اصلاحات پر تبادلہ خیال

اقوام متحدہ ۔( نمائندہ خصوصی):اقوام متحدہ میں پاکستان کے مستقل مندوب عاصم افتخار احمد نے مین ہیٹن یونیورسٹی کے20 طلبہ سے ملاقات میں اہم علاقائی اور عالمی مسائل پرپاکستان کے موقف پر روشنی ڈالی اور اقوام متحدہ میں پاکستان کے کردار کو اجاگر کیا۔پاکستانی مندوب نے اقوام متحدہ کی اہمیت کو اجاگر کرتے ہوئے کہا کہ یہ واحد ایسا فورم ہے جو بین الاقوامی قانونی حیثیت اور اعتماد کے ساتھ عالمی مسائل پر اجتماعی کارروائی کی سہولت فراہم کرتا ہے۔ انہوں نے مصنوعی ذہانت، پائیدار ترقی کے اہداف (SDGs)، اور موسمیاتی تبدیلی کے اثرات جیسے ابھرتے ہوئے چیلنجز سے نمٹنے کے لئے عالمی تعاون کی ضرورت پر زور دیا۔ اقوام متحدہ کی اصلاحات پر گفتگو کرتے ہوئے سفیر نے کہا کہ پاکستان سکیورٹی کونسل میں مزید مستقل نشستوں کے اضافہ کی حمایت نہیں کرتا، بلکہ غیر مستقل ارکان کی تعداد میں اضافے کے حق میں ہے جو یوایف سی گروپ کا موقف ہے۔ملاقات میں سمندری اور غذائی سکیورٹی ، جبری ہجرت، پانی کی کمی، پناہ گزینوں کے مسائل اور بین الاقوامی پانی کے وسائل کے اشتراک جیسے موضوعات پر بھی بات ہوئی، اور مؤثر کثیرالجہتی اقدامات کی اہمیت پر زور دیا گیا۔پاکستانی سفیر نے کہا کہ آئندہ اقوام متحدہ کے سیکرٹری جنرل کے انتخاب کا عمل ایک اہم لمحہ ثابت ہوگا۔