اسلام آباد( نمائندہ خصوصی):وفاقی وزیر برائے بورڈ آف انویسٹمنٹ قیصر احمد شیخ سے کنلن گروپ اور اویسس گروپ کے اعلیٰ سطحی وفد نے ملاقات کی۔ وفد میں ژیونگ شیانگ لونگ، چن میفن، دانش احمد اور احسن جبار شامل تھے۔اجلاس میں ایڈیشنل سیکرٹری بورڈ آف انویسٹمنٹ ارفع اقبال، ڈی جی محمود طفیل اور دیگر اعلیٰ حکام بھی شریک تھے۔ملاقات کے دوران اویسس گروپ اور اس کے جاری و مستقبل کے منصوبوں پر بریفنگ دی گئی جن میں لاہور میں اویسس ریزورٹس اور دیگر 
صنعتی و رہائشی منصوبے شامل ہیں۔نوری آباد میں 2800 ایکڑ پر مشتمل اویسس سائنوا پاک گلوبل ولیج منصوبے کو خصوصی اہمیت دی گئی جو سرمایہ کاری اور صنعتی ترقی کے لیے ایک اہم قدم ہے۔اجلاس میں ستمبر 2025ء میں ہونے والے ایم او یو کا بھی حوالہ دیا گیا اور زراعت، توانائی اور دیگر شعبوں میں تعاون بڑھانے پر اتفاق کیا گیا۔وفاقی وزیر قیصر احمد شیخ نے چینی وفد کا خیر مقدم کرتے ہوئے پاکستان میں سرمایہ کاری کے وسیع مواقع اجاگر کیے۔ انہوں نے کہا کہ وزیر اعظم محمدشہباز شریف چینی سرمایہ کاروں کو سہولت فراہم کرنے میں خصوصی دلچسپی رکھتے ہیں۔وفاقی وزیر نے چین کے ساتھ اپنے دیرینہ تعلقات کا ذکر کرتے ہوئے کہا کہ وہ 1972ء سے چین کے ساتھ مضبوط روابط رکھتے ہیں اور چین کے لیے گہرا احترام رکھتے ہیں۔انہوں نے اپنے کاروباری تجربے اور کراچی چیمبر آف کامرس کے سابق صدر ہونے کا بھی حوالہ دیا۔وفاقی وزیر نے وفد کو ہر ممکن 
سہولت فراہم کرنے کی یقین دہانی کروائی اور خصوصی اقتصادی زونز میں سرمایہ کاری کے مواقع سے آگاہ کیا۔انہوں نے کہا کہ پاکستان اور چین کی دوستی پر ہمیں فخر ہے اور موجودہ وقت سرمایہ کاری کے لیے نہایت موزوں ہے۔دونوں فریقین نے ایم او یو کے تحت تعاون کو مزید فروغ دینے پر اتفاق کیا جس میں لاہور کے رہائشی منصوبے، کراچی میں ہوا سے توانائی کے منصوبے اور زرعی شعبہ شامل ہیں۔بورڈ آف انویسٹمنٹ سرمایہ کاروں کو سہولت فراہم کرنے، کاروبار دوست ماحول کے فروغ اور پائیدار اقتصادی شراکت داری کے قیام کے لیے پرعزم ہے۔
