لاہور۔( نمائندہ خصوصی):وزیراعلی پنجاب مریم نواز کی منظوری کے بعد چیف منسٹرز ایڈلٹ کارڈیک سرجری پروگرام کا باقاعدہ آغاز کردیا گیا ۔چیف منسٹرز ایڈلٹ کارڈیک سرجری پروگرام کے تحت امراض قلب کے مریضوں کو سالانہ 3ارب روپے سے زائد کی رقم کے علاج معالجہ کی مفت سہولیات فراہم کی جائیں گی۔اس حوالہ سے پنجاب ہیلتھ انیشی ایٹومینجمنٹ کمپنی میں اہم اجلاس منعقدہوا۔چیئرمین وزیراعلی پنجاب ایڈوائزی کمیٹی برائے امراض قلب ڈاکٹر فرقد عالمگیر، سیکرٹری محکمہ سپیشلائزڈ ہیلتھ کیئر اینڈ میڈیکل ایجوکیشن عظمت محمود اورسی ای او پنجاب ہیلتھ انیشی ایٹو مینجمنٹ کمپنی ڈاکٹر علی رزاق نے شرکت کی۔صوبائی وزیر صحت خواجہ سلمان رفیق نے اظہار خیال کرتے ہوئے کہا کہ ہیلتھ اکانومسٹ ڈاکٹر محمد عدنان خان،چیئرمین وزیراعلی پنجاب ایڈوائزی کمیٹی برائے امراض قلب ڈاکٹر فرقد عالمگیر، سیکرٹری محکمہ سپیشلائزڈ ہیلتھ کیئر اینڈ میڈیکل ایجوکیشن عظمت محمود اورسی ای او پنجاب ہیلتھ انیشی ایٹو مینجمنٹ کمپنی ڈاکٹر علی رزاق کی کاوشوں کو
سراہتے ہیں ،وزیر اعلی پنجاب کی قیادت میں صحت کے شعبہ میں تاریخی اور بنیادی اقدامات اٹھائے جا رہے ہیں ،اس پروگرام کو پہلے فیزمیں پنجاب کے 9سرکاری کارڈیک جبکہ 15نجی کارڈیک اداروں سے شروع کیاجارہاہے۔انہوں نے کہا کہ9سرکاری کارڈیک اداروں میں پنجاب انسٹی ٹیوٹ آف کارڈیالوجی لاہور،راولپنڈی انسٹی ٹیوٹ آف کارڈیالوجی ،قائداعظم میڈیکل کالج بہاولپور ،سردارفتح محمد خان انسٹی ٹیوٹ آف کارڈیالوجی ڈی جی خان،فیصل آبادانسٹی ٹیوٹ آف کارڈیالوجی ،ساہیوال انسٹی ٹیوٹ آف کارڈیالوجی ،شیخ زیدہسپتال اینڈمیڈیکل کالج رحیم یارخان،ملتان انسٹی ٹیوٹ آف کارڈیالوجی اوروزیرآبادانسٹی ٹیوٹ آف کارڈیالوجی شامل ہیں ۔اس پروگرام کے تحت مریضوں کی آسانی کیلئے مزید ہسپتالوں کو بھی امپینل کیا جائے گا، اس پروگرام کے تحت سرکاری کارڈیک اداروں کو اپ گریڈ بھی کیا جا رہا ہے، اس پروگرام کے بعد ایڈلٹ کارڈیک سرجریز کی ویٹنگ لسٹ میں واضح کمی آئے گی، اس پروگرام میں ہر قسم کے دل کے آپریشن (ایڈلٹ کارڈیک سرجری) کے طریقہ کار اس پروگرام کے تحت شامل کئے گئے ہیں ،سرکاری کارڈیک ادارے بنیادی اندراج اور علاج کے مراکز ہوں گے، نجی ہسپتالوں کو ریفرل صرف ملٹی ڈسپلنری ٹیم کے ذریعے کیا جائے گا، عوام تک صحت کی بہترین سہولیات کی فراہمی کیلئے کوشاں ہیں ، پنجاب کی عوام کو صحت کی بہترین سہولیات فراہم کرنے کیلئے تمام تر وسائل بروئے کار لائے جارہے ہیں ۔چیئرمین وزیراعلی پنجاب ایڈوائزری کمیٹی برائے امراض قلب ڈاکٹرفرقدعالمگیرنے اظہارخیال کرتے ہوئے کہا کہ فی مریض سالانہ کوریج 10لاکھ روپے کی ہو گی،ایسے مریضوں کیلئے ریزرو فنڈ مختص ہوگا جن کا مقررہ پیکیج علاج کے دوران ختم ہو جائے یا جن کے پیچیدہ کیسز معیاری پیکیج کی حد سے تجاوز کر جائیں ۔سیکرٹری محکمہ سپیشلائزڈ ہیلتھ کیئر اینڈ میڈیکل ایجوکیشن عظمت محمود نے اظہار خیال کرتے ہوئے کہا کہ چیف منسٹرز ایڈلٹ کارڈیک سرجری پروگرام کی کامیابی کیلئے آئی ٹی بیسڈ ڈیش بورڈ بنایا جائے گا،یہ پروگرام ہزاروں انسانی زندگیاں بچانے کا سبب بنے گا۔
چیف منسٹرز ایڈلٹ کارڈیک سرجری پروگرام کا باقاعدہ آغاز کر دیا گیا
