ملک بھر میں کل سے بارشوں، آندھی اور ژالہ باری کے نئے سلسلے کی پیشگوئی، الرٹ جاری

اسلام آباد۔( نمائندہ خصوصی):محکمہ موسمیات نے ملک بھر میں (کل) منگل 24 مارچ کی شام سے تیز ہواؤں، آندھی اور گرج چمک کے ساتھ بارشوں کے ایک نئے اور طاقتور سلسلے کی پیشگوئی کر دی ہے۔محکمہ موسمیات کے مطابق مغربی ہواؤں کا ایک سلسلہ 24 مارچ کی شام کو ملک کے جنوبی حصوں میں داخل ہوگا، جو 27 مارچ کی رات سے مزید شدت اختیار کر جائے گا۔ یہ موسمی نظام 30 مارچ تک وقفے وقفے سے جاری رہنے کا امکان ہے، جس کے باعث ملک کے بیشتر حصوں میں موسم میں بڑی تبدیلی متوقع ہے۔صوبہ بلوچستان کے بیشتر اضلاع بشمول کوئٹہ، ژوب، زیارت، چمن، مکران کے ساحلی علاقوں، گوادر اور لسبیلہ میں 24سے25مارچ اور دوبارہ 27 سے 29 مارچ کے دوران تیز ہواؤں اور گرج چمک کے ساتھ بارش اور چند مقامات پر ژالہ باری کا امکان ہے۔ اسی طرح خیبر پختونخوا کے اضلاع پشاور، چترال، سوات، ایبٹ آباد، مانسہرہ اور مروت میں 25 سے 26 مارچ اور پھر 28 سے 30 مارچ کے دوران موسلا دھار بارش اور پہاڑوں پر برف باری کی پیشگوئی کی گئی ہے۔پنجاب اور اسلام آباد میں بھی موسم کی صورتحال تبدیل رہے گی۔ وفاقی دارالحکومت، مری، گلیات، راولپنڈی، لاہور، فیصل آباد، ملتان اور بہاولپور سمیت صوبے کے بیشتر اضلاع میں 25 سے 26 مارچ اور پھر 28 سے 30 مارچ کے دوران آندھی اور گرج چمک کے ساتھ بارش متوقع ہےجبکہ اس دوران چند مقامات پر ژالہ باری کا بھی امکان ظاہر کیا گیا ہے۔سندھ میں کراچی، سکھر، جیکب آباد اور لاڑکانہ میں 26 اور 29 مارچ کے دوران تیز ہواؤں کے ساتھ بارش ہو سکتی ہے۔ اس کے علاوہ کشمیر اور گلگت بلتستان میں 25 سے 30 مارچ تک وقفے وقفے سے بارش اور پہاڑوں پر برف باری متوقع ہے۔محکمہ موسمیات نے ممکنہ خطرات کے حوالے سے الرٹ جاری کرتے ہوئے کہا ہے کہ بالائی خیبر پختونخوا، مری، گلیات، گلگت بلتستان اور کشمیر میں لینڈ سلائیڈنگ کا خدشہ ہے۔مزید برآں بلوچستان کے ندی نالوں میں 25 سے 28 مارچ اور خیبر پختونخوا میں 28 سے 30 مارچ کے دوران طغیانی (فلیش فلڈنگ) کا خطرہ ہے۔ حکام نے خبردار کیا ہے کہ شدید آندھی اور ژالہ باری سے کھڑی فصلوں، بجلی کے کھمبوں اور سولر پینلز کو نقصان پہنچ سکتا ہے لہٰذا کسانوں اور سیاحوں کو محتاط رہنے اور غیر ضروری سفر سے اجتناب کی ہدایت کی گئی ہے۔