پیرس۔( نمائندہ خصوصی):پیرس میں پاکستانی سفارت خانہ میں یومِ پاکستان کے حوالے سے ایک سادہ اور باوقار پرچم کشائی کی تقریب منعقد ہوئی۔ تقریب میں پاکستانی کمیونٹی کی بڑی تعداد اور سفارتخانے کے افسران نے شرکت کی۔ موجودہ علاقائی صورتحال اور حکومتی ہدایات کے پیش نظر تقریب کو سادگی اور اختصار کے ساتھ منعقد کیا گیا۔یہاں موصولہ پریس ریلیز کے مطابق اس موقع پر صدرِ مملکت، وزیرِ اعظم اور وزیرِ خارجہ کے پیغامات بھی پڑھ کر سنائے گئے۔
تقریب سے خطاب کرتے ہوئے فرانس میں پاکستان کی سفیر ممتاز زہرہ بلوچ نے بابائے قوم محمد علی جناح کی بصیرت افروز قیادت کو خراجِ تحسین پیش کیا ۔انہوں نے پاکستانی قوم کی جرات و استقامت کو سراہتے ہوئے کہا کہ قوم نے اپنی تاریخ میں ہر مشکل کا مقابلہ ہمت اور اتحاد سے کیا ہے۔ انہوں نے گزشتہ سال مئی میں ہونے والے معرکۂ حق اور آپریشنز بنیان مرصوص اور غضب للحق کا حوالہ دیتے ہوئے کہا کہ پاکستان نے اپنی خودمختاری اور علاقائی سالمیت کے تحفظ کے لیے غیر متزلزل عزم کا مظاہرہ کیا۔
ممتاز زہرہ بلوچ نے کہا کہ یومِ پاکستان کے موقع پر ہمیں ان لوگوں کو بھی نہیں بھولنا چاہیے جو جبر اور غیر ملکی قبضے کا شکار ہیں۔ انہوں نے فلسطین اور بھارتی غیر قانونی زیرِ قبضہ جموں و کشمیر کے عوام کے لیے پاکستان کی مستقل سفارتی اور سیاسی حمایت کا اعادہ کیا۔سفیر پاکستان نے پاکستان اور فرانس کے درمیان تعلقات کی اہمیت کو بھی اجاگر کیا اور دونوں ممالک کے درمیان باہمی روابط، تجارت اور سرمایہ کاری کے فروغ کے عزم کا اعادہ کیا۔ انہوں نے فرانس میں مقیم پاکستانی کمیونٹی کی خدمات کو سراہتے ہوئے کہا کہ وہ دونوں ممالک کے درمیان عوامی سطح پر روابط کو مضبوط بنانے میں اہم کردار ادا کر رہی ہے۔
