موٹروے پولیس کی بڑی کارروائی،مسافروں کو 60 لاکھ سے زائد اضافی کرایہ واپس دلوا دیا گیا

اسلام آباد۔( نمائندہ خصوصی):نیشنل ہائی ویز اینڈ موٹروے پولیس نے مسافروں کے حقوق کے تحفظ اور ٹریفک قوانین کی پاسداری کے حوالے سے جاری مہم میں بڑی کامیابی حاصل کی ہے۔ آئی جی موٹروے پولیس سلطان احمد چوہدری کی خصوصی ہدایات پر 15 مارچ سے شروع ہونے والی اس مہم کے دوران اب تک لاکھوں روپے کا اضافی کرایہ مسافروں کو موقع پر واپس کروایا جا چکا ہے۔ اہم کارروائیاں اور اعداد و شمار ترجمان موٹروے پولیس کی جانب سے جاری کردہ تفصیلات کے مطابق، شاہراہوں پر نظم و ضبط برقرار رکھنے کے لیے سخت اقدامات کیے جا رہے ہیں۔ٹرانسپورٹ مالکان کی جانب سے وصول کیا گیا 60 لاکھ روپے سے زائد کا اضافی کرایہ مسافروں کو واپس دلوا دیا گیا۔اوور لوڈنگ، اوور چارجنگ اور نامکمل سفری دستاویزات پر اب تک 22 ہزار سے زائد گاڑیوں کے چالان کیے جا چکے ہیں۔کفایت شعاری اور ایندھن کی بچت کے لیے 12 مارچ سے نافذ کی گئی نئی حدِ رفتار کی خلاف ورزی کرنے والی 24 ہزار سے زائد گاڑیوں کے خلاف قانونی کارروائی کی گئی۔ موٹروے پولیس کے افسران ملک بھر کے ٹول پلازوں پر موجود ہیں، جہاں وہ ڈرائیوروں اور مسافروں کو نئی حدِ رفتار اور روڈ سیفٹی کے اصولوں سے متعلق آگاہی فراہم کر رہے ہیں۔ ترجمان موٹروے پولیس کا کہنا ہے کہ شہری کسی بھی قسم کی زیادتی یا شکایت کی صورت میں براہ راست موٹروے پولیس افسران سے رجوع کر سکتے ہیں۔ اس کے علاوہ ہیلپ لائن 130 یا آفیشل سوشل میڈیا ہینڈل @NHMPofficial پر بھی اپنی شکایات درج کروائی جا سکتی ہیں۔