چیئرپرسن بینظیر انکم سپورٹ پروگرام سینیٹر روبینہ خالد کا رحیم یار خان میں پیش آنے والے افسوس ناک واقعے پر گہرے دکھ کا اظہار

اسلام آباد۔( نمائندہ خصوصی):چیئرپرسن بینظیر انکم سپورٹ پروگرام سینیٹر روبینہ خالد نے رحیم یار خان میں پیش آنے والے افسوس ناک واقعے پر گہرے دکھ کا اظہار کیا ہے۔ صدر پاکستان آصف علی زرداری کی ہدایت پر چیئرپرسن بی آئی ایس پی سینیٹر روبینہ خالد فوری طور پر رحیم یار خان روانہ ہو گئی ہیں تاکہ موقع پر پہنچ کر صورتحال کا جائزہ لیں اور متاثرہ خاندانوں سے اظہارِ یکجہتی کریں۔چیئرپرسن بی آئی ایس پی کی ہدایت پر ہیڈکوارٹرز سے ایک اعلیٰ سطحی کمیٹی فوری طور پر رحیم یار خان روانہ ہو چکی ہے جو واقعے کی مکمل تحقیقات اور ذمہ داران کا تعین کرکے 24 گھنٹوں کے اندر تفصیلی رپورٹ پیش کرے گی ۔واقعے میں ممکنہ غفلت کے پیشِ نظر متعلقہ پارٹنر بینک کو نوٹس جاری کر دیا گیا ہے جبکہ اس پر بھاری جرمانہ بھی عائد کیا جا رہا ہے۔ بی آئی ایس پی کی جانب سے جاں بحق ہونے والی خواتین کے لواحقین کے لیے 10 لاکھ روپے جبکہ زخمی خواتین کے لیے 3 لاکھ روپے مالی امداد دی جائے گی اور یہ ادائیگیاں کل تک مکمل کر دی جائیں گی۔ چیئرپرسن سینیٹر روبینہ خالد نے کہا ہے کہ اس افسوسناک واقعے کی شفاف تحقیقات کی جائیں گی اور متعلقہ پارٹنر بینک کے نمائندگان کے خلاف سخت قانونی کارروائی عمل میں لائی جائے گی جبکہ متاثرہ خاندانوں کو ہر ممکن تعاون فراہم کیا جائے گا۔