اسلام آباد۔( نمائندہ خصوصی)وفاقی وزیر برائے انفارمیشن ٹیکنالوجی و ٹیلی کمیونیکیشن شزا فاطمہ خواجہ نے کہا ہے کہ عالمی یومِ خواتین ایک اہم دن ہے جو ہمیں خواتین اور بچیوں کے حقوق اور ان کی ترقی کے لیے اپنی ذمہ داری یاد دلاتا ہے کہ خواتین اور بچیوں کو زندگی کے ہر شعبےخاص طور پر تیزی سے ترقی کرتی ہوئی ڈیجیٹل دنیامیں سیکھنے، آگے بڑھنے اور قیادت کرنے کے برابر مواقع ملیں۔خواتین کے عالمی دن کے موقع پر اپنے پیغام میں انہوں نے کہا کہ اس سال کا موضوع ’’حقوق، انصاف، عمل : تمام خواتین اور بچیوں کے لیے‘‘ اس بات کی طرف توجہ دلاتا ہے کہ ہمیں صرف باتیں نہیں بلکہ عملی اقدامات کرنے کی ضرورت ہے۔ آج کے ڈیجیٹل دور میں ٹیکنالوجی تک رسائی، ڈیجیٹل تعلیم اور محفوظ آن لائن ماحول خواتین اور بچیوں کے لیے
بہت اہم ہیں تاکہ وہ تعلیم، معیشت اور سماجی زندگی میں بھرپور حصہ لے سکیں۔انہوں نے کہا کہ پاکستان میں خواتین ٹیکنالوجی، کاروبار اور ڈیجیٹل جدت کے شعبوں میں نمایاں کارکردگی دکھا رہی ہیں۔ ان کی صلاحیت، محنت اور قیادت پاکستان کے ڈیجیٹل مستقبل کو مضبوط بنانے میں اہم کردار ادا کر رہی ہیں ۔انہوں نے کہا کہ وفاقی وزیر برائے انفارمیشن ٹیکنالوجی و ٹیلی کمیونیکیشن کی حیثیت سے میں اس عزم کا اعادہ کرتی ہوں کہ ہم خواتین اور بچیوں کیلئے ڈیجیٹل مواقع کو بڑھائیں گے، ٹیکنالوجی کے شعبے میں خواتین کی شرکت کو فروغ دیں گے اور آن لائن ماحول کو زیادہ محفوظ بنانے کے لیے اقدامات کریں گے۔وفاقی وزیر نے کہا کہ ڈیجیٹل مہارتوں کی تربیت، خواتین کی قیادت میں جدت کی حوصلہ افزائی اور آن لائن ہراسانی کے خلاف بہتر تحفظ فراہم کرنے کے ذریعے ہم ایسا ڈیجیٹل نظام بنانا چاہتے ہیں جہاں خواتین اور بچیاں اعتماد کے ساتھ سیکھ سکیں، کام کر سکیں اور آگے بڑھ سکیں۔انہوں نے کہا کہ اس عالمی یومِ خواتین کے موقع پر آئیے ہم عہد کریں کہ ٹیکنالوجی اور جدت کے ذریعے خواتین اور بچیوں کو بااختیار بنائیں گے اور مل کر پاکستان کے لیے ایک زیادہ محفوظ، منصفانہ اور بہتر ڈیجیٹل مستقبل بنائیں گے۔
ٹیکنالوجی اور جدت کے ذریعے خواتین اور بچیوں کو بااختیار بنائیں گے ،وفاقی وزیر شزا فاطمہ خواجہ
