خواتین کے عالمی : چیئرپرسن پنجاب ویمن پروٹیکشن اتھارٹی حنا پرویز بٹ کا شیلٹر ہوم لاہور کا دورہ، مقیم خواتین اور بچیوں کے ساتھ یومِ خواتین منایا

لاہور( نمائندہ خصوصی) خواتین کے عالمی دن کے موقع پر چیئرپرسن پنجاب ویمن پروٹیکشن اتھارٹی حنا پرویز بٹ نے شیلٹر ہوم لاہور کا دورہ کیا، جہاں انہوں نے مقیم خواتین اور بچیوں کے ساتھ یومِ خواتین منایا، کیک کاٹا اور شیلٹر ہوم میں فراہم کی جانے والی سہولیات کا تفصیلی جائزہ لیا۔ اس موقع پر انہوں نے شیلٹر ہوم میں موجود تمام مقیم خواتین اور بچیوں سے فرداً فرداً ملاقات کی، ان سے گفتگو کی اور ان کے مسائل، احساسات اور ضروریات کو نہایت توجہ سے سنا۔دورے کے دوران حنا پرویز بٹ نے شیلٹر ہوم کے مختلف حصوں کا معائنہ کیا اور رہائش، خوراک، تحفظ، طبی سہولیات، صفائی، بچیوں کی نگہداشت اور دیگر انتظامات کا جائزہ لیا۔ انہوں نے متعلقہ افسران کو ہدایت کی کہ شیلٹر ہوم میں مقیم خواتین اور بچیوں کو ہر ممکن سہولت، تحفظ اور باعزت ماحول کی فراہمی یقینی بنائی جائے تاکہ وہ خود کو محفوظ، پُراعتماد اور باوقار محسوس کر سکیں۔
اس موقع پر حنا پرویز بٹ نے خواتین کے عالمی دن کے حوالے سے اپنے پیغام میں کہا کہ آج کا دن صرف ایک تقریب نہیں بلکہ اس عزم کی تجدید کا دن ہے کہ معاشرے کی ہر عورت کو عزت، تحفظ، انصاف اور بااختیار ماحول فراہم کیا جائے۔ انہوں نے کہا کہ وزیراعلیٰ پنجاب مریم نواز شریف کا وژن ایک ایسے پنجاب کا قیام ہے جہاں ہر عورت خود کو محفوظ، باوقار اور بااختیار محسوس کرے۔ انہوں نے مقیم خواتین سے جذباتی انداز میں گفتگو کرتے ہوئے کہا، ”آپ اکیلی نہیں ہیں، ہم آپ کے ساتھ ہیں، حکومت پنجاب آپ کے ساتھ ہے، ہر مظلوم عورت کے ساتھ ہے۔ آپ تنہا نہیں ہیں، آپ کی حفاظت، عزت اور بہتر مستقبل ہماری ذمہ داری ہے۔”حنا پرویز بٹ نے مزید کہا کہ شیلٹر ہوم صرف ایک پناہ گاہ نہیں بلکہ امید، حوصلے اور نئی زندگی کی علامت ہے، جہاں آنے والی ہر خاتون کو یہ احساس دلانا ضروری ہے کہ وہ باعزت ہے، اہم ہے، اور اس کے درد کو سمجھنے والا ایک مضبوط نظام موجود ہے۔ انہوں نے کہا کہ خواتین پر ظلم، جبر اور ناانصافی کسی صورت برداشت نہیں کی جائے گی اور پنجاب ویمن پروٹیکشن اتھارٹی ہر مظلوم خاتون کے ساتھ کھڑی رہے گی۔اس موقع پر شیلٹر ہوم میں مقیم خواتین اور بچیوں نے حنا پرویز بٹ کا پرتپاک استقبال کیا اور ان کے ساتھ خوشی کا اظہار کیا۔ مقیم خواتین نے وزیراعلیٰ پنجاب مریم نواز شریف اور حنا پرویز بٹ کی خواتین کے تحفظ، فلاح اور بحالی کے لیے کی جانے والی کاوشوں کو سراہا اور شکریہ ادا کیا۔ خواتین نے اس امر پر خوشی کا اظہار کیا کہ انہیں نہ صرف تحفظ اور سہولیات میسر ہیں بلکہ ان کے مسائل سننے، ان سے بات کرنے اور ان کی دلجوئی کے لیے بھی خصوصی توجہ دی جا رہی ہے۔میڈیا سے گفتگو کرتے ہوئے حنا پرویز بٹ نے کہا کہ خواتین کے عالمی دن پر یہ پیغام دینا ضروری ہے کہ ہر عورت عزت، تحفظ اور انصاف کی حق دار ہے۔ انہوں نے کہا کہ ہمیں ایک ایسا معاشرہ تشکیل دینا ہے جہاں کوئی بھی عورت خود کو بے سہارا محسوس نہ کرے۔ انہوں نے کہا کہ خواتین کے لیے محفوظ، باوقار اور بااختیار پنجاب ہی دراصل وزیراعلیٰ پنجاب مریم نواز شریف کے وژن کا عکس ہے۔