پاکستان-بنگلہ دیش نالج کوریڈور کے تحت علامہ محمد اقبال سکالرشپس کے لیے منتخب کیے گئے بنگلہ دیشی طلبہ کا پہلا دستہ پاکستان پہنچ گیا

اسلام آباد۔( نمائندہ خصوصی):پاکستان-بنگلہ دیش نالج کوریڈور کے تحت علامہ محمد اقبال سکالرشپس کے لیے منتخب کیے گئے بنگلہ دیشی طلبہ کا پہلا دستہ پاکستان پہنچ گیا ہے۔ 45 طلبہ پر مشتمل یہ بیچ اعلیٰ تعلیم کے حصول کے لیے ملک کی معروف جامعات میں داخلہ لے گا۔ایچ ای سی کے مطابق طلبہ کا جناح انٹرنیشنل ایئرپورٹ کراچی پہنچنے پر ہائر ایجوکیشن کمیشن (ایچ ای سی) پاکستان اور متعلقہ جامعات کے نمائندوں نے پرتپاک استقبال کیا۔ حکام کے مطابق مزید بنگلہ دیشی طلبہ آئندہ ہفتے پاکستان پہنچیں گے۔ ایچ ای سی نے بنگلہ دیشی طلبہ کے لیے نیک تمنائوں کا اظہار کرتے ہوئے ان کی تعلیمی کامیابی اور پاکستان میں یادگار قیام کے لیے دعا کی ہے۔کمیشن نے اس عزم کا اعادہ کیا کہ بین الاقوامی طلبہ کو معیاری تعلیم، سازگار تعلیمی ماحول اور مکمل سہولیات فراہم کی جائیں گی تاکہ وہ اپنی تعلیمی سرگرمیوں میں بھرپور کامیابی حاصل کر سکیں۔پاکستان-بنگلہ دیش نالج کوریڈور کا مقصد دونوں برادر ممالک کے درمیان تعلیمی تعاون کو فروغ دینا اور عوامی سطح پر روابط کو مزید مستحکم بنانا ہے۔ یہ اقدام باہمی اعتماد، علمی اشتراک اور نوجوان نسل کے درمیان تعلقات کے استحکام کی جانب ایک اہم پیش رفت قرار دیا جا رہا ہے۔