چیئرمین پی سی بی محسن نقوی کی سری لنکن وزیر کھیل سے ملاقات، کھیلوں کے فروغ پر تعاون بڑھانے پر اتفاق

کولمبو ( نمائندہ خصوصی):چیئرمین پاکستان کرکٹ بورڈ(پی سی بی )محسن نقوی نے سری لنکا کے وزیر کھیل و امور نوجوانان سنیل کمارا گیمیج سے ملاقات کی جس میں باہمی دلچسپی کے امور خصوصاً کھیلوں، بالخصوص کرکٹ کے فروغ کے حوالے سے تعاون بڑھانے پر تفصیلی تبادلہ خیال کیا گیا۔ملاقات میں پاکستان اور سری لنکا کے درمیان کرکٹ سمیت دیگر کھیلوں میں اشتراک کو مزید وسعت دینے پر اتفاق کیا گیا۔ دونوں رہنماؤں نے اس عزم کا اظہار کیا کہ کھیلوں کے میدان میں قریبی تعاون سے نہ صرف کھلاڑیوں کو بہتر مواقع میسر آئیں گے بلکہ دونوں ممالک کے تعلقات بھی مزید مضبوط ہوں گے۔محسن نقوی نے کہا کہ پاکستان اور سری لنکا کے تعلقات میں گرمجوشی آ رہی ہے اور کرکٹ و دیگر کھیلوں کے ذریعے باہمی روابط کو مزید مستحکم بنایا جا سکتا ہے۔ انہوں نے ٹی ٹونٹی ورلڈ کپ کے موقع پر شاندار انتظامات کو سراہتے ہوئے سری لنکن حکام کی کاوشوں کی تعریف کی۔ چیئرمین پی سی بی محسن نقوی نے کہا کہ انہیں سری لنکا میں بے پناہ محبت ملی اور شاندار مہمان نوازی پر سری لنکن حکومت اور عوام کے شکر گزار ہیں۔اس موقع پر محسن نقوی نے سری لنکن وزیر کھیل کو پاکستان کے دورے کی باقاعدہ دعوت بھی دی۔ملاقات میں سری لنکا میں پاکستان کے ہائی کمشنر میجر جنرل (ر) فہیم العزیز، ایڈوائزر ٹو چیئرمین پی سی بی عامر میر، چیف آپریٹنگ آفیسر پی سی بی سمیر احمد اور چیف ایگزیکٹو آفیسر پی ایس ایل سلمان نصیر بھی موجود تھے۔