اسلام آباد۔( نمائندہ خصوصی)انسٹیٹیوٹ آف سٹریٹجک سٹڈیز اسلام آباد (آئی ایس ایس آئی) اور انسٹیٹیوٹ آف انٹرنیشنل پولیٹکس اینڈ اکونومکس (آئی آئی پی ای) کے درمیان باہمی تعاون کو فروغ دینے کے لیے مفاہمت کی یادداشت (ایم او یو) پر دستخط کر دیئے گئے۔ آئی ایس ایس آئی میں منعقدہ تقریب میں آئی آئی پی ای کے وفد نے شرکت کی جس کی قیادت ڈائریکٹر پروفیسر ڈاکٹر برانیسلاو ڈورڈیویچ کر رہے تھے جبکہ وفد میں ڈپٹی ڈائریکٹر ڈاکٹر ایوونا لادیواک بھی شامل تھیں۔ وفد کا 
استقبال آئی ایس ایس آئی کے چیئرمین سفیر خالد محمود نے کیا۔ملاقات کے دوران دونوں اداروں کے نمائندوں نے علاقائی اور عالمی امور پر تفصیلی تبادلہ خیال کیا اور پاکستان اور سربیا کے درمیان اکیڈمک و تھنک ٹینک سطح پر روابط کو مستحکم بنانے کی ضرورت پر زور دیا۔ اس موقع پر مشترکہ تحقیق، پالیسی ڈائیلاگ، سیمینارز اور اکیڈمک تبادلوں کو فروغ دینے پر اتفاق کیا گیا۔ بعد ازاں مفاہمت کی یادداشت پر دستخط کی تقریب منعقد ہوئی جس میں آئی آئی پی ای کی جانب سے پروفیسر ڈاکٹر برانیسلاو ڈورڈیویچ اور آئی ایس ایس آئی کی جانب سے سفیر خالد محمود نے دستخط کیے۔ایم او یو کے تحت دونوں ادارے تحقیق، اشاعتی سرگرمیوں اور علمی تعاون کے مختلف شعبوں میں مشترکہ اقدامات کریں گے۔تقریب کے اختتام پر سفیر خالد محمود نے معزز مہمانوں کو یادگاری تحائف پیش کیے اور اس عزم کا اعادہ کیا کہ آئی ایس ایس آئی، آئی آئی پی ای کے ساتھ دیرپا اور موثر اکیڈمک شراکت داری کو مزید وسعت دینے کے لیے پرعزم ہے۔
