راولپنڈی۔( نمائندہ خصوصی) :خیبرپختونخوا میں سکیورٹی فورسز نے خفیہ اطلاعات پر کارروائیاں کرتے ہوئے بھارتی حمایت یافتہ 11خوارج کو ہلاک کر دیا۔پاک فوج کے شعبہ تعلقات عامہ (آئی ایس پی آر)کے مطابق8 جنوری 2026 کو صوبہ خیبر پختونخوا میں دو الگ الگ کارروائیوں کے دوران بھارتی پراکسی فتنہ الخوارج سے تعلق رکھنے والے گیارہ خوارج ہلاک کر دیئے گئے ۔ خوارج کی 
موجودگی کی اطلاع پر سیکیورٹی فورسز نے ضلع شمالی وزیرستان میں انٹیلی جنس بیسڈ آپریشن کیا۔ آپریشن کے دوران سیکیورٹی فورسز نے خوارج کے ٹھکانے کو مؤثر انداز میں نشانہ بنایا اور شدید فائرنگ کے تبادلے کے بعد6 خوارج کو ہلاک کر دیا ۔اسی طرح ضلع کرم میں پولیس اور سیکیورٹی فورسز نے مشترکہ انٹیلی جنس بیسڈ آپریشن کیا۔ فائرنگ کے تبادلے میں 5 خوارج کو ہلاک کر دیا ۔ہلاک ہونے والے بھارتی حمایت یافتہ خوارج سے اسلحہ اور گولہ بارود بھی برآمد ہوا ہے، یہ خوارج سیکیورٹی 
فورسز، قانون نافذ کرنے والے اداروں اور معصوم شہریوں کی ٹارگٹ کلنگ سمیت متعدد دہشت گرد کارروائیوں میں ملوث رہے۔علاقے میں کسی بھی دیگر بھارتی سرپرستی یافتہ خوارج کے خاتمے کے لیے کلیئرنس/سینیٹائزیشن آپریشنز جاری ہیں۔ وفاقی ایپکس کمیٹی کی جانب سے نیشنل ایکشن پلان کے تحت منظور شدہ عزمِ استحکام کے وژن کے تحت سیکیورٹی فورسز اور قانون نافذ کرنے والے اداروں کی جانب سے جاری بے مثال انسدادِ دہشت گردی مہم پوری رفتار سے جاری رہے گی تاکہ ملک سے غیر ملکی سرپرستی اور حمایت یافتہ دہشت گردی کے ناسور کا مکمل خاتمہ کیا جا سکے۔
