پائلٹ پراجیکٹ میں ٹرانسجینڈر بچوں کے لیے سالانہ تقریبِ کا انعقاد

لاہور۔( نمائندہ خصوصی) :پنجاب پولیس کے پائلٹ پراجیکٹ تحفظ درسگاہ میں ٹرانسجینڈر بچوں کے لیے سالانہ تقریبِ تقسیمِ انعامات منعقد کی گئی، جس میں تعلیمی میدان میں نمایاں کارکردگی دکھانے والے طلبہ میں انعامات تقسیم کیے گئے۔ ترجمان کے مطابق تقریب میں انچارج تحفظ مرکز لبرٹی عاصمہ رحمان سمیت تدریسی و انتظامی عملے نے شرکت کی۔آئی جی پنجاب نے انعامات حاصل کرنے والے طلبہ کو شاباش دیتے ہوئے کہا کہ ٹرانسجینڈر بچوں کی تعلیمی کامیابیاں تحفظ درسگاہ کے محفوظ اور تعمیری ماحول کا واضح ثبوت ہیں۔ انہوں نے کہا کہ تحفظ درسگاہ لاوارث بچوں کے لیے ایک محفوظ چھت ہے، جہاں انہیں رہائش، خوراک اور معیاری تعلیم فراہم کی جا رہی ہے،انہوں نے کہا کہ تحفظ درسگاہ میں ٹرانسجینڈر بچوں کے اعتماد اور روشن مستقبل کو یقینی بنایا جا رہا ہے جبکہ تعلیم و تربیت سمیت دیگر سہولیات کی فراہمی کے لیے موثر اقدامات کیے جا رہے ہیں۔