اسلام آباد( نمائندہ خصوصی):پاکستان نے ایک بار پھر اپنے اس دیرینہ موقف کا اعادہ کیا ہے کہ وہ کشمیری عوام کی حق خود ارادیت کے حصول کی منصفانہ جدوجہد میں ان کی غیر متزلزل اخلاقی، سیاسی اور سفارتی حمایت جاری رکھے گا۔ ترجمان دفتر خارجہ طاہر حسین اندرابی نے جمعرات کو یہاں ہفتہ وار پریس بریفنگ میں کہا کہ 5 جنوری کو پاکستان کے عوام نے جموں و کشمیر کے عوام کے ساتھ مل کر یوم حق خود ارادیت منایا۔انہوں نے کہا کہ یہ دن 1949ء میں اقوام متحدہ کی اس قرارداد کی یاد دلاتا ہے جس میں کشمیری عوام کے اس حق کو تسلیم کیا گیا کہ وہ اقوام متحدہ کی نگرانی میں ایک آزاد اور منصفانہ استصواب رائے کے ذریعے اپنے مستقبل کا فیصلہ کریں۔ ترجمان نے کہا کہ بین الاقوامی قانون حق خود ارادیت کو اقوام متحدہ کے 
منشور میں شامل ایک بنیادی اصول کے طور پر تسلیم کرتا ہے، کشمیری عوام گزشتہ سات دہائیوں سے بھارت کی جانب سے اس ناقابل تنسیخ حق سے محروم رکھے جا رہے ہیں۔انہوں نے کہا کہ جموں و کشمیر پر بھارت کا مسلسل غیر قانونی قبضہ ہمارے عہد کے المناک اور حل طلب تنازعات میں سے ایک ہے۔ ترجمان نے کہا کہ بھارت کے غیر قانونی طور پر زیر تسلط جموں و کشمیر کے عوام کو منظم جبر، سنگین انسانی حقوق کی خلاف ورزیوں اور بنیادی حقوق و انسانی وقار سے انکار کا سامنا ہے۔ انہوں نے کہا کہ بھارت کشمیری عوام کی حقیقی قیادت کو خاموش کرانے بالخصوص میڈیا کو دبانے کی مسلسل کوششیں کررہا ہے، کشمیری سیاسی نظر بندوں کی تعداد میں مسلسل اضافہ ہورہا ہے جبکہ قابض حکام نے مقبوضہ علاقہ میں 16 سیاسی تنظیموں پر پابندی عائد کردی ہے، بے گناہ کشمیریوں کی پروفائلنگ، ہراسانی، اندھادھند گرفتاریاں اور نام نہاد ”کارڈن اینڈ سرچ“ آپریشنز مقبوضہ علاقے میں معمول بن چکے ہیں۔ترجمان دفتر خارجہ نے کہا کہ ہزاروں کشمیری رہنما اور سول سوسائٹی کے اراکین قید و بند کی صعوبتیں برداشت کررہے ہیں۔ مسرت عالم، شبیر احمد شاہ، آسیہ اندرابی، ڈاکٹر قاسم فکتو، ایڈووکیٹ عبدالقیوم، فہمیدہ صوفی اور دیگر کئی رہنما برسوں سے قید میں ہیں۔ محمد یاسین ملک کو ایک نام نہاد عدالتی کارروائی کے 
بعد سزا سنائی گئی جبکہ خرم پرویز اور صحافی عرفان معراج بھارتی قابض حکام کی انتقامی کارروائیوں کے باعث تاحال جیل میں قید ہیں۔ طاہر حسین اندرابی نے کہا کہ 5 اگست 2019ء کو بھارت کے غیر قانونی اور یکطرفہ اقدامات بھارتی غیر قانونی قبضے کو آبادیاتی تبدیلی کے ذریعے مضبوط بنانے کی کھلی کوشش ہیں۔انہوں نے کہا کہ ان اقدامات کا مقصد کشمیری عوام کو ان کے اپنے وطن میں ایک بے اختیار اور محروم برادری میں تبدیل کرنا ہے جو بین الاقوامی قانون اور حقِ خود ارادیت کے مسلمہ اصولوں کی صریح خلاف ورزی ہے۔ ترجمان نے کہا کہ بھارتی غیر قانونی زیر قبضہ جموں و کشمیر میں دہائیوں پر محیط ظلم و جبر اور بے شمار قربانیوں کے ساتھ کشمیری عوام نے اپنے جائز حقِ خود ارادیت کے حصول کےلئے اپنی جدوجہد میں ثابت قدمی کا مظاہرہ کیا ہے۔ انہوں نے کہا کہ پاکستان کشمیری عوام کی حق خود ارادیت کے حصول کی منصفانہ جدوجہد میں ان کی غیر متزلزل اخلاقی، سیاسی اور سفارتی حمایت جاری رکھنے کے عزم کا اعادہ کرتا ہے۔
