اسلام آباد۔( نمائندہ خصوصی):وفاقی تحقیقاتی ادارے (ایف آئی اے ) کے اینٹی کرپشن سرکل اسلام آباد نے 2025ء کے دوران بھی کرپشن کے خلاف زیرو ٹالرنس پالیسی اپناتے ہوئے اہم کامیابیاں حاصل کیں، ایف آئی اے نے ملزمان سے کرپشن کے110.25 ملین روپے برآمد، مختلف وفاقی محکموں میں کرپشن میں ملوث 132 ملزمان کو گرفتار جبکہ بروقت تفتیش مکمل کرکے عدالتوں میں چالان پیش کیے جن کی روشنی میں عمران خان اور اہلیہ بشری بیگم سمیت 64 ملزمان کو سزائیں ہوئیں۔وفاقی تحقیقاتی
ادارے (ایف آئی اے) کے اینٹی کرپشن سرکل اسلام آباد کی رپورٹ کے مطابق سال2025ء کے دوران مجموعی طور پر 485 انکوائریاں منطقی انجام تک پہنچائی گئیں جبکہ موصول ہونے والی شکایات پر 389 نئی تحقیقات کا آغاز کیا گیا۔ وفاقی محکموں میں بدعنوانی پر 122 مقدمات درج کیے گئے جن میں سے 67 کیسز کے چالان مکمل کر کے عدالتوں میں پیش کیے گئے۔2025ء عدالتی فیصلوں کے لحاظ سے بھی اہم رہا جہاں 20 مقدمات میں مجموعی طور پر 64 مجرموں کو سزائیں دلوائی گئیں۔توشہ خانہ II کیس سابق وزیراعظم عمران احمد نیازی اور بشریٰ بی بی کو 17، 17 سال قید اور مجموعی طور پر 3 کروڑ 28 لاکھ روپے سے زائد جرمانے کی سزا سنائی گئی۔سنگین جرائم میں ملوث ہونے پر حامد جلیل کو 29 سال اور قمر زمان کو 27 سال قید کی سزا سنائی ہوئیں۔ اسی طرح نسیم مسیح کو 17 سال قید اور 100 ملین روپے بھاری جرمانے کی سزا دی گئی۔ایف آئی اے اسلام آباد زون کی یہ کارکردگی کرپشن کے خاتمے اور قومی خزانے کے تحفظ میں ایک سنگ میل قرار دی جا رہی ہے۔
ایف آئی اے اینٹی کرپشن سرکل اسلام آباد کی سالانہ کارکردگی ، 11 کروڑ ریکوری، 132 گرفتاریاں،عمران خان اور بشری بیگم سمیت 64 ملزمان کو سزائیں
