چیئرمین پاکستان علما ء کونسل حافظ محمد طاہر محمود اشرفی مشرقِ وسطیٰ اور مسلم ممالک میں مذہبی ہم آہنگی اور پاکستانی ڈائسپورا کیلئے کوآرڈینیٹر مقرر

اسلام آباد۔( نمائندہ خصوصی):وزیراعظم شہباز شریف نے پاکستان علما ء کونسل کے چیئرمین حافظ محمد طاہر محمود اشرفی کو مشرقِ وسطیٰ اور مسلم ممالک میں مذہبی ہم آہنگی اور پاکستانی ڈائسپورا کے لئے کوآرڈینیٹر مقرر کر دیا ہے۔ یہ تقرری ایک نہایت اہم وقت میں عمل میں آئی ہے جب پاکستان بدلتے ہوئے علاقائی حالات کے تناظر میں مسلم دنیا کے ساتھ اپنے روابط کو مضبوط بنانے کا خواہاں ہےجبکہ خلیجی اور دیگر اسلامی ممالک کے ساتھ تعلقات کی سٹریٹجک اہمیت بھی بڑھتی جا رہی ہے۔یہ بات جمعرات کو یہاں جاری ہونے والے ایک پریس ریلیز میں کہی گئی۔ حافظ طاہر اشرفی اس سے قبل خصوصی نمائندے کے طور پر خدمات انجام دے چکے ہیں اور مذہبی سفارتکاری، بین المذاہب روابط اور بین الاقوامی سطح پر رابطہ کاری کا وسیع تجربہ رکھتے ہیں۔اپنے نئے کردار میں وہ باہمی رابطہ کاری کو فروغ دینے، باہمی ہم آہنگی کو مستحکم کرنے اور اسلامی و عرب ممالک کے ساتھ پاکستان کے تعلقات کو مزید بہتر بنانے بالخصوص مذہبی ہم آہنگی اور بیرونِ ملک مقیم پاکستانیوں کی فلاح و بہبود سے متعلق امور کے ذمہ دار ہوں گے ۔مذہبی اور مسلکی ہم آہنگی، رواداری اور پُرامن بقائے باہمی کے فروغ کے لئے اپنی کاوشوں کے باعث حافظ طاہر اشرفی کو وسیع پیمانے پر سراہا جاتا ہے۔ انہوں نے پاکستان میں مختلف مذہبی مکاتبِ فکر کے درمیان مکالمے کے فروغ میں اہم کردار ادا کیا ہے۔ وہ رابطۃ العالم الاسلامی کی سپریم کونسل کے رکن بھی ہیں اور متعدد نمایاں بین الاقوامی اور اسلامی تنظیموں سے وابستہ ہیں۔عرب اور مسلم دنیا کے ممتاز اسلامی علما اور اعلیٰ شخصیات کے ساتھ ان کے قریبی اور دیرینہ تعلقات قائم ہیں۔ یہ تقرری مذہبی ہم آہنگی کے فروغ، مسلم ممالک کے ساتھ مثبت اور تعمیری روابط کو مضبوط بنانے اور بیرونِ ملک پاکستان کے مفادات اور اوورسیز کمیونٹی کی مؤثر نمائندگی کو یقینی بنانے کے لئے حکومت کے عزم کی عکاس ہے۔