کینیڈین حکومت کاعالمی یومِ خواندگی کے موقع پر پاکستان میں سیلاب سے متاثرہ علاقوں میں تعلیمی بحالی کے عزم کا اعادہ

اسلام آباد(نمائندہ خصوصی ):عالمی یومِ خواندگی کے موقع پر کینیڈا نے پاکستان میں سیلاب سے متاثرہ علاقوں میں تعلیمی نظام کی بحالی کے لیے اپنے عزم کا اعادہ کیا ہے۔ یہ اقدامات اقوامِ متحدہ کے ترقیاتی پروگرام (یو این ڈی پی) پاکستان کے اشتراک سے جاری "ری اسٹور” منصوبے کے تحت کیے جا رہے ہیں۔کینیڈین حکومت کی جانب سے جاری بیان میں کہا گیا ہے کہ ری اسٹور منصوبہ جسمانی، سماجی اور ساختی رکاوٹوں کو دور کر کے خاص طور پر لڑکیوں کے لیے تعلیمی مواقع کو یقینی بناتا ہے تاکہ وہ سیکھیں،، ترقی کریں اور قیادت کا کردار ادا کر سکیں۔اس منصوبے کے ذریعے سکولوں کی بحالی، تعلیمی وسائل کی فراہمی اور کمیونٹی کی سطح پر شعور اجاگر کرنے جیسے اقدامات کیے جا رہے ہیں۔ کینیڈا کا کہنا ہے کہ تعلیم ہر بچے کا بنیادی حق ہے اور لڑکیوں کی تعلیم میں سرمایہ کاری ایک روشن اور پائیدار مستقبل کی ضمانت ہے۔