1965 کی جنگ اور معرکہء حق کے دوران فضائی شاہینوں کی جرات اور شجاعت کو خراجِ تحسین پیش کرتا ہوں،اسپیکر قومی اسمبلی سردار ایاز صادق

اسلام آباد(نمائندہ خصوصی ):اسپیکر قومی اسمبلی سردار ایاز صادق نے کہا ہے کہ 1965 کی جنگ اور معرکہء حق کے دوران فضائی شاہینوں کی جرات اور شجاعت کو خراجِ تحسین پیش کرتا ہوں،قوم کو اپنی پاک فضائیہ پر فخر ہے۔یومِ فضائیہ کے موقع پر اپنے پیغام میں پاک فضائیہ کے جانباز شاہینوں کی قربانیوں کو خراج عقیدت پیش کرتے ہوئے اسپیکر سردار ایاز صادق نے کہا کہ 1965ء کی جنگ اور معرکہء حق میں پاک فضائیہ نے بہادری اور پیشہ ورانہ مہارت کی عظیم تاریخ رقم کی،ایئر کموڈور ایم ایم عالم نے ایک منٹ سے کم وقت میں پانچ بھارتی طیارے مار گرائے،ایئر مارشل نور خان، ایم ایم عالم اور جانباز شاہین آج بھی نوجوان نسل کے لیے مشعلِ راہ ہیں،پاک فضائیہ ہر جارحیت کا مقابلہ کرنے کے لیے ہمہ وقت تیار ہے۔اسپیکر سردار ایاز صادق نے کہا کہ معرکۂ حق میں پاک فضائیہ نے دنیا کو اپنی پیشہ ورانہ صلاحیتوں کے جوہر دکھائے،معرکہء حق میں پاک فضائیہ کے جانباز شاہینوں نے دشمن کے چھ طیارے مار گرائے۔اسپیکر سردار ایاز صادق نے کہا کہ معرکہ حق کے دوران پاک فضائیہ نے مادرِ وطن کے دفاع کو ناقابل تسخیر بنانے کے عزم کو ثابت کیا، پاکستان کی مسلح افواج ہر جارحیت کا ڈٹ کر مقابلہ کرنے کی صلاحیت رکھتی ہیں،قوم افواج پاکستان کے ساتھ مل کر دشمن کی ہر سازش کو ناکام بنانے کیلئے پر عزم ہے۔اسپیکر سردار ایاز صادق نے کہا کہ شہداء کے اہلِخانہ کے جذبۂ استقامت کو پوری قوم سلام پیش کرتی ہے،پوری قوم شہداء کے اہلخانہ کے شانہ بشانہ کھڑی ہے۔اسپیکر سردار ایاز صادق نے شہداء کے درجات کی بلندی کیلئے دعا کی۔