وفاقی وزیر مذہبی امور سے بنگلہ دیشی صدر کے مشیر ملاقات ،جوائنٹ ورکنگ گروپ تشکیل دینے پر اتفاق

اسلام آباد۔(نمائندہ خصوصی ):وفاقی وزیر مذہبی امور سردار محمد یوسف سے بنگلہ دیشی صدر کے مشیر برائے مذہبی امور اے ایف ایم خالد حسین نے جمعہ کو وفد کے ہمراہ ملاقات کی ۔ وزات مذہبی امور کے مطابق بنگلہ دیشی وفد نے پاکستان میں سیلاب سے جانی و مالی نقصان پر افسوس کا اظہار کیا۔وفد سے بات چیت کرتے ہوئے وزیر مذہبی امور نے کہا کہ پاکستانی عوام کو بنگلہ دیشی عوام کے ساتھ برادرانہ جذبات ہیں۔دونوں ممالک کے تعلقات مشترکہ روایات، اسلامی ورثے، سماجی اقدار کی بنیادوں پر استوار ہیں۔پاکستان اور بنگلہ دیش کے درمیان تعلقات میں بہتری خطے کے لئے اہم ثابت ہوگی۔ بنگلہ دیشی صدر کے مشیر نے کہا کہ بھرپور استقبال پر پاکستانی عوام اور حکومت کے شکرگزار ہیںدونوں ممالک کی وزارت مذہبی امور کے مابین تعاون کو فروغ دینے کیلئے اقدامات کریں گے۔وفاقی وزیر سردار محمد یوسف نے دونوں ممالک کے علماء کرام اور مدارس کے طلباکے تبادلوں کی تجویز دی۔ ملاقات میں پاکستان اور بنگلہ دیش کے مابین بین المذاہب ہم آہنگی کے فروغ کیلئے جوائنٹ ورکنگ گروپ تشکیل دینے پر اتفاق کیا گیا ۔بنگلہ دیشی وفد پاکستان میں ہونے والی دو روزہ بین الاقوامی سیرت کانفرنس میں شرکت کرے گا۔