اسلام آباد۔(نمائندہ خصوصی ):وفاقی وزیرداخلہ محسن نقوی سے بحرین کے وزیر داخلہ لیفٹیننٹ جنرل راشد بن عبداللہ الخلفیہ کا ٹیلیفونک رابطہ ہوا ہے ،بحرین کے وزیرداخلہ نے پاکستان میں حالیہ بارشوں اور سیلاب سے ہونے والے جانی نقصان پر دکھ اور 
افسوس کا اظہار کیا ۔اتوار کووزارت داخلہ کی جانب سے جاری بیان کے مطابق بحرینی وزیر داخلہ نے جاں بحق افراد کے لواحقین سے دلی ہمدردی اور تعزیت کا اظہار کیا ،بحرینی وزیر داخلہ نے سیلاب متاثرین کیلئے پاکستانی ہم منصب کو ہرممکن مدد کی پیشکش کرتے ہوئے کہاکہ مشکل کی گھڑی میں پاکستانی بہن بھائیوں کے ساتھ کھڑے ہیں،متاثرین سیلاب کی مددکیلئے حاضر ہیں۔وزیرداخلہ محسن نقوی نے سیلاب متاثرین کے ساتھ یکجہتی کا اظہار کرنے پر بحرینی ہم منصب کا شکریہ ادا کیا۔ انہوں نے کہا کہ پاکستان موسمیاتی تبدیلیوں سے انتہائی متاثرہ ملک ہے،سیلاب، بارشوں اور کلائوڈ برسٹ سے ہونے والی تباہی الفاظ میں بیان نہیں کی جا سکتی۔
