خاتون اول آصفہ بھٹو زرداری سے پنک ربن پاکستان کے چیف ایگزیکٹو افسر عمر آفتاب کی ملاقات

اسلام آباد۔(نمائندہ خصوصی):خاتون اول آصفہ بھٹو زرداری سے پنک ربن پاکستان کے چیف ایگزیکٹو افسر (سی ای او) عمر آفتاب نے ایوان صدر میں ملاقات کی اور چھاتی کے سرطان کی روک تھام کے لیے مشترکہ کوششوں کی ضرورت پر زور دیا۔ایوان صدر کے پریس ونگ سے بدھ کو جاری بیان کے مطابق خاتون اول نے کہا کہ حکومتی اداروں، طبی ماہرین، میڈیا اور کمیونٹیز کو مشترکہ جدوجہد کی ضرورت ہے۔ آصفہ بھٹو زرداری نے کہا کہ پاکستان میں ہر نو میں سے ایک خاتون چھاتی کے سرطان کے خطرے سے دوچار ہے۔ انہوں نے کہا کہ تاخیر سے تشخیص ہر سال ہزاروں خواتین کی جان لے لیتی ہے۔خاتون اول نے کہا کہ بروقت تشخیص کی صورت میں شفا یابی کی شرح نوے فیصد سے زائد ہے۔ آصفہ بھٹو زرداری نے کہا کہ ہر خاتون کو بروقت سکریننگ، درست تشخیص اور معیاری علاج کی سہولت ملنی چاہیے۔ خاتون اول نے کہا کہ خواتین کی صحت کو قومی ترجیح بنانا چاہیے ۔آصفہ بھٹو زرداری نے کہا کہ دیہی علاقوں میں چھاتی کے سرطان کے علاج اور تشخیص کی سہولیات بڑھانے کی ضرورت ہے۔ خاتون اول نے کہا کہ موبائل میموگرافی یونٹس اور کمیونٹی آئوٹ ریچ پروگرام کے فروغ کی ضرورت ہے، میڈیا، تعلیمی شعبے اور مذہبی رہنما ملک گیر آگاہی مہم میں کردار ادا کریں۔