اسلام آباد۔(نمائندہ خصوصی)پاکستان نے غزہ پر اسرائیل کے مہلک فضائی حملوں کی شدید مذمت کی ہے جس میں 400 سے زائد بے گناہ فلسطینی شہید ہوگئے جن میں زیادہ تر خواتین اور بچے شامل ہیں۔ترجمان دفتر خارجہ نے منگل کو ایک بیان میں 
کہا کہ رمضان المبارک کے مقدس مہینے میں جارحیت کا یہ بھیانک عمل جنگ بندی معاہدے کی کھلی خلاف ورزی ہے اور اس خطرناک اضافے کی نشاندہی کرتا ہے جس سے پورے خطے کو ایک بار پھر عدم استحکام کا خطرہ ہے۔انہوں نے کہا کہ ہم عالمی 
برادری پر زور دیتے ہیں کہ وہ تشدد کے فوری خاتمے کے لیے اپنا کردار ادا کرے اور غزہ اور مشرق وسطیٰ میں فوری اور دیرپا امن کے لیے سفارتی کوششیں دوبارہ شروع کرے۔
