کراچی(اسٹاف رپورٹر) وزیر اطلاعات سندھ شرجیل انعام میمن نے کہا ہے کہ ملکی اداروں پر بہتان تراشی پی ٹی آئی کا وطیرہ بن گئی ہے۔ہم افواج پاکستان، عدلیہ، الیکشن کمیشن اور تمام اداروں کے ساتھ ہیں۔ اتوار کو پی ٹی آئی رہنماء فواد چوہدری کے الیکشن کمیشن سے متعلق بیان پر رد عمل دیتے ہوئے وزیر اطلاعات سندھ شرجیل انعام میمن نے کہا ہے کہ پاکستان تحریک انصاف فارن فنڈنگ کیس میں اپنے خلاف متوقع فیصلے پر بوکھلاہٹ کا شکار ہو گئی ہے۔ انہوں نے کہا ہے کہ الیکشن کمشنر پر الزامات قابل مذمت ہیں، موجودہ چیف الیکشن کمشنر کے انتخاب کا کریڈٹ خود عمران خان لیتے رہے ہیں۔ انہوں نے کہا ہے کہ پی ٹی آئی قیادت جانتی ہے فارن فنڈنگ کیس وہ پھنس چکے ہیں۔ شرجیل میمن نے مزید کہا کہ ملکی اداروں پر بہتان تراشی پی ٹی آئی کا وطیرہ بن گئی ہے۔ ہم افواج پاکستان، عدلیہ، الیکشن کمیشن اور تمام اداروں کے ساتھ ہیں۔ انہوں نے پاکستان تحریک انصاف کے رہنمائوں کو متنبہ کیا ہے کہ وہ ملکی اداروں پر ہرزہ سرائی سے باز رہیں۔
