سندھ زرعی یونیورسٹی ٹنڈوجام سے الحاق شدہ زید اے بھٹو زرعی کالج ڈوکری کے زیر اھتمام انگریزی زبان و ادب کے حوالے سے کانفرنس کا انعقاد کیا گیا، کالج لائبریری کے آڈیٹوریم ہال میں زرعی مباحثہ، کوئز، گرامر تقاریر، گائیکی، پریزنٹیشن آئیڈیاز اور کمپیئرنگ کے متعلق اس کانفرنس کا مقصد طلباء میں اعلی درجے کی زرعی تعلیم کے ساتھ ساتھ انگریزی زبان پر عبور اور ان کا اعتماد بحال کرنا اور انگریزی ادب کی اہمیت اور مواصلاتی ضروریات کے بارے میں آگاہ کرنا تھا، تقریب سے خطاب کرتے ہوئے زید اے بھٹو زرعی کالج ڈوکری کے پرنسپل ڈاکٹر اللہ ودھایو گانداھی نے کہا کہ انگریزی زبان نے دنیا کی قوموں کے درمیان رابطے کی ایک اہم زبان کا درجہ حاصل کر لیا ہے، جبکہ ادب ، تدریس اور تحقیق کے میدان میں انگریزی اہم زبان کے طور پر ثابت کیا ہے۔ انہوں نے کہا کہ ہمارے نوجوانوں کو انگریزی سیکھ کر اپنا اعتماد بحال کرنا چاہیے، جبکہ انگریزی زبان دنیا میں زرعی تعلیم کے بارے میں بہت اھم مواد دستیاب ہے۔ انہوں نے کہا کہ انگریزی ادب عالمی معیاری ادب میں شامل ہے، کانفرنس کے دوران ڈاکٹر سلطان میتلو، پروفیسر غلام قادر چانڈیو، ڈاکٹر محمود جامڑو، ڈاکٹر جاوید شبیر ڈار، عبدالحمید میمن اور دیگر نے انگریزی زبان کی اہمیت پر زور دیا۔ پروگرام کے اختتام کے دوران کامیاب طلباء میں پرنسپل ڈاکٹر اللہ ودھایو گانداھی نے انعامات تقسیم کئے۔
