لاہور: وزیر اعظم کے معارن خصوصی برائے سیاسی روابط شہباز گل کا کہنا ہے کہ وزیر اعظم عمران خان کے خوف سے سارے چور اکٹھے ہوگئے۔
پریس کانفرنس کے دوران معاون خصوصی شہباز گل نے اپوزیشن جماعتوں کو تنقید کا نشانہ بنایا۔ شہباز گل نے کہا کہ کرپٹ ٹولہ اپنی چوری بچانے کے لیے ہاتھ پاؤں مار رہا ہے، کرپٹ ٹولہ نے پاپڑ اور ریڑھی لگانے والوں کو راتوں رات امیر بنا دیا۔
شہباز گل نے کہا کہ وزیراعظم عمران خان کے خوف سے یہ سارے چور اکٹھے ہوئے ہیں، ایک دوسرے کا پیٹ پھاڑنے والے اپنی چوری بچانے کے لیے ایک ہوگئے، اپوزیشن احتساب سے بچنے کے لیے تحریک عدم اعتماد لانی چاہتی ہے۔
انہوں نے کہا کہ کل اور پرسوں اپوزیشن کے حلقوں میں ہلچل دیکھی، اپوزیشن ایک دوسرے سے مل کر کہتے ہیں تحریک عدم اعتماد لانا چاہتے ہیں، یہ وہ لوگ ہیں جو ایک دوسرے کو کرپٹ کہتے تھے جب وزیراعظم عمران خان آئے تو اپوزیشن کو سب اکٹھا ہونا پڑ۔
معارن خصوصی نے کہا کہ شہباز شریف کے دن گنے جا چکے ہیں، ان کو این آر او اور نہ ڈھیل ملے گی، شہباز شریف فرد جرم سے بچنے کے لیے یہ سب کر رہے ہیں، ملک مقصود چپڑاسی کے اکاؤنٹ سے 4 ارب روپے نکلے، شریفوں نے ملک مقصود چپڑاسی کو 9 ہزار روپے پر بھرتی کیا، شہباز شریف نے ملک مقصود چپڑاسی کو ارب پتی بنا دیا۔
شہباز گل نے کہا کہ آصف علی زرداری نے پاپڑ اور سموسے والے کو ارب پتی بنا دیا، غریبوں کو ارب پتی بنانے والوں کو تمغہ ملنا چاہیے۔
انہوں نے کہا کہ ہم احتساب کا پھندا اور مضبوط کریں گے۔
خیال رہے کہ اپوزیشن جماعت کے اتحاد پی ڈی ایم نے حکومت کے خلاف تحریک عدم اعتماد لانے کا اعلان کر دیا ہے۔
