وزیر اعظم کی زیر صدارت تعلیم اور صحت سے متعلق ٹاسک فورس کا اجلاس

اسلام آباد(نمائندہ خصوصی)نگران وزیراعظم انوار الحق کاکڑ کی زیر صدارت ملک میں طبی تعلیم اور مریضوں کی دیکھ بھال میں اصلاحات کے لیے تشکیل شدہ ٹاسک فورس کا اجلاس ہوا،اجلاس میں وزارت صحت، کالج آف فزیشنز اینڈ سرجنز آف پاکستان، پاکستان میڈیکل اینڈ ڈینٹل کونسل، ہائیر ایجوکیشن کمیشن اور ملک کی میڈیکل یونیورسٹیز کے اشتراک سے شعبہ صحت کے لیے لیے گئے اقدامات پر بریفنگ دی گئی ،بریفنگ میں مزید بتایا گیا کہ شعبہ صحت میں اصلاحات کے لیے تین مراحل پر مشتمل حکمت عملی بنائی گئی ہے، اس حکمت عملی کا مقصد پاکستانی شعبہ صحت میں بین الاقوامی معیار کے مطابق قواعد و ضوابط کا نفاذ یقینی بنانا ہے،اجلاس میں شعبہ صحت میں گریجویٹ اور پوسٹ گریجویٹ سطحوں پر اصلاحاتی حکمت عملی پر بریفنگ بھی دی گئی،وزیراعظم نے معاون خصوصی ڈاکٹر عامر بلال کی قیادت میں شعبہ صحت میں اصلاحات کے لیے ٹاسک فورس کے اقدامات کو سراہا،اجلاس میں وزیراعظم کو ملک میں صحت کے شعبے کو بین الاقوامی معیار پر لانے کے لیے بنائی گئی حکمت عملی پر بریفنگ دی گئی،وزیراعظم نے اجلاس میں صحت کے شعبے کی موجودہ صورتحال اور اس میں اصلاحات کی ضرورت پر زور دیا ،وزیر اعظم کا مزید کہنا تھا کہ افرادی قوت کی عالمی مارکیٹ میں صحت کے شعبے کے ماہرین کی مانگ پوری کرنے کے لیے ملک میں شعبہ صحت میں اصلاحات لائی جائیں،نرسنگ ایک انتہائی اہم شعبہ ہے اور اس کی ترقی کیلئے مزید توجہ کی ضرورت ہے۔