بلاول اور آصف زرداری لاہور پہنچ گئے ، سینٹرل ایگزیکٹیو کمیٹی کا اجلاس آج طلب

لاہور (نمائندہ خصوصی) پاکستان پیپلز پارٹی کے چیئرمین بلاول بھٹو زرداری اور سابق صدر آصف علی زرداری لاہور پہنچ گئے ہیں۔ بتایا گیا ہے کہ بلاول بھٹو زرداری ملتان اور سابق صدر آصف علی زرداری کراچی سے لاہور پہنچے ہیںجبکہ دوسری طرف پی پی پی کے چیئرمین بلاول بھٹو زرداری نے پاکستان پیپلز پارٹی کی سینٹرل ایگزیکٹیو کمیٹی کا ایک اجلاس آج مورخہ 14ستمبر بروز جمعرات کو سہ پہر 3بجے بلاول ہاﺅس لاہور میں طلب کر لیا ہے جس کی صدارت پارٹی کے چیئرمین بلاول بھٹو زرداری اور سابق صدر آصف علی زرداری کریں گے۔ اجلاس کے ایجنڈے میں آئندہ ہونے والے عام انتحابات، سینٹرل پنجاب میں ٹکٹوں کا اجرائ، پارٹی لاہور اور پارٹی سینٹرل پنجاب کی تنظیموں کی کارکردگی اور سندھ میں ہونے والے ترقیاتی کاموں پر بریفنگ سمیت دیگر امور شامل ہیں۔ یہ بھی بتایا گیا ہے کہ اجلاس میں سابق وزیراعظم یوسف رضا گیلانی کو جنوبی پنجاب میں کوئی اہم ذمہ داری سونپے جانے کا امکان ہے۔