کراچی(نمائندہ خصوصی) میئر کراچی بیرسٹر مرتضیٰ وہاب نے کہا ہے کہ متوقع بارشوں سے قبل نالوں کی صفائی کو یقینی بنایا جائے،برساتی نالوں سے بڑے پتھر اور بلاکس نکالے جارہے ہیں،شہری اس ضمن میں اداروں کا ساتھ دیں، تعمیراتی کام کے دوران برساتی نالوں میں تعمیراتی مواد کو گرنے سے بچایا جائے، بلدیہ عظمیٰ کراچی کے تمام ادارے متحرک ہو کر کام کریں، یہ بات انہوں نے ضلع وسطی میں پوسٹ آفس نالہ سمیت دیگر نالوں کا جائزہ لینے کے دوران کہی، پیپلز پارٹی ضلع ساﺅتھ کے جنرل سیکریٹری کرم اللہ وقاصی ، ضلع وسطی کے صدر مسرور احسن، جنرل سیکریٹری دل محمد ، کے ایم سی کے محکمہ انجینئرنگ کے افسران بھی اس موقع پر موجود تھے، میئر کراچی نے کہا کہ شہر میں 50 سے زائد مقامات پر روزانہ کی بنیاد پر برساتی نالوں کی صفائی کا کام جاری ہے اور اسے مسلسل جاری رکھا جائے تاکہ تیز بارشوں کے دوران بھی ان نالوں میں برساتی پانی کی نکاسی ہوسکے، انہوں نے کہا کہ ٹاﺅن میونسپل کارپوریشنز کو بھی ہدایت کی گئی ہے کہ وہ اپنے اپنے علاقوں میں چھوٹے نالوں کی صفائی کا کام تیزی کے ساتھ مکمل کریں اور برسات کے دوران عملے کو فعال رکھیں تاکہ ان چھوٹے نالوں کے ذریعے برساتی پانی کو بڑے نالوں میں منتقل کیا جاسکے، میئر کراچی نے یہ بھی ہدایت کی کہ وہ اپنے اپنے علاقوں میں صفائی ستھرائی کا خیال رکھیں خصوصاً برسات کے دوران جراثیم کش ادویات کا اسپرے بھی کریں۔
