ملازمین کے علاج معالجے کے حوالے سے اقدامات کیے جائیں گے ۔

ڈی جی کے ڈی اے کراچی ( اسٹاف رپورٹر )ڈائریکٹر جنرل ادارہ ترقیات کراچی سید محمد علی شاہ نے کہا ہے کہ ملازمین کے علاج معالجے کے حوالے سے اقدامات کیے جائیں گے ۔ لوکل باڈیز رپورٹرز ایسوسی ایشن کو دفتر الاٹ کرنے کی درخواست پر جلد عمل درآمد ہوجائےگا جبکہ لبرا سے 15 روزہ ملاقات رکھی جائے کی تاکہ کے ڈی اے اور صحافیوں کے درمیان باہمی مشاورت کا سلسلہ جاری رہے اور اس شہر کی ترقی میں تیزی آئے ۔ ان خیالات کا اظہار انہوں نے سوک سینٹر میں موجود اپنے دفتر میں لوکل باڈیز رپورٹرز ایسوسی ایشن کے وفد سے ملاقات کے موقع پر لبرا وفد سے کے موقع پر گفتگو کرتے ہوئے کیا ۔ وفد میں شامل صدر تنویر سید، جنرل سیکریٹری عمران علی شاہ ، سینیئر نائب صدر جوہر مجید شاہ ، جوائنٹ سیکریٹری سید جنید احمد، فنانس سیکریٹری عابد عباسی اور ممبر گورننگ باڈی زاہد حسین فخری شامل تھے۔ملاقات کے دوران مختلف امور پر تفصیلی تبادلہ خیال کیا گیا۔ اس موقع پر ڈی جی کے ڈی اے سید محمد علی شاہ نے کہا کہ ملازمین کو بنیادی حقوق کی فراہمی نہ صرف اولین ترجیحات میں شامل ہیں بلکہ ادارہ کو معاشی طور پر مستحکم کرنے اور ترقی یافتہ اداروں کی فہرست میں شامل کرنے کے لئے ہر ممکنہ اقدامات کئے جائیں گے، بہت جلد مثبت اقدامات کے اثرات نمایاں ہوں گے۔ لوکل باڈیز رپورٹرز ایسوسی ایشن کے وفد نے سید محمد علی شاہ کو ڈائریکٹر جنرل ادارہ ترقیات کراچی کے عہدہ پر مبارکباد دیتے ہوئے یقین دہانی کرائی کہ ڈی جی کے ڈی اے کے ہر مثبت اقدامات کو عوامی سطح پر اجاگر کرنے کے ساتھ ساتھ ایسوسی ایشن بھرپور تائید و حمایت جاری رکھے گی۔ لبرا وفد نے ڈی جی کے ڈی اے محمد علی شاہ کو پھولوں کا گلدستہ پیش کیا ۔ بعدازاں ڈی جی کے ڈی اے نے لوکل باڈیز رپورٹرز ایسوسی ایشن کے وفد کو سندھ کی ثقافت کو اجاگر کرتے ہوئے اجرک اور سندھی ٹوپی پیش کی۔