ٹنڈوجام( نمائندہ خصوصی ) سندھ زرعی یونیورسٹی کے زیر میزبانی ریسلنگ کے سندھ ریجن کا فائنل کراچی نے جیت لیا، کراچی نے مختلف ویٹ کیٹیگریز میں 4 گولڈ اور 4 سلور میڈل حاصل کرکے پہلی پوزیشن حاصل کی، تفصیلات کے مطابق سندھ زرعی یونیورسٹی کے زیر اہتمام اور ہائر ایجوکیشن کمیشن کے تعاون سے یونیورسٹی کے اسپورٹس کمپلیکس میں ٹیلنٹ ہنٹ یوتھ اسپورٹس لیگ کے ریسلنگ مقابلوں میں سخت مقابلے کے بعد سندھ کے دارالحکومت کراچی نے مختلف کیٹگریز میں 4 گولڈ اور 4 سلور میڈل اور 100 پوانٹس کے ساتھ پہلی پوزیشن حاصل کرکے سندھ ریجن کی فاتح قرار پائی ہے، سخت مقابلوں کے بعد 61 کلوگرام ویٹ کیٹیگری میں ضیاء اللہ گولڈ میڈل، 70 کلوگرام ویٹ کیٹیگری میں حمزو خان گولڈ میڈل، 79 کلوگرام ویٹ کیٹیگری میں محمد فاروق گولڈ میڈل اور 86 کلوگرام ویٹ کیٹیگری میں سجاول خان نے گولڈ میڈل حاصل کیا۔اس طرح حیدرآباد ریجن نے 65 کلوگرام کیٹیگری میں شعیب لغاری نے گولڈ میڈل، 74 کلوگرام کیٹیگری میں محمد سمیع نے گولڈ میڈل اور 92 کلوگرام ویٹ کیٹیگری میں محی الرحمن نے گولڈ میڈل حاصل کیا۔جبکہ حیدرآباد نے تین چاندی کے تمغے، دو کانسی کے تمغے اور 77 پوائنٹس کے ساتھ دوسری پوزیشن حاصل کی۔
سندھ کے تیسرے بڑے شہر سکھر نے ایک گولڈ میڈل، دو سلور میڈل اور 5 برانز میڈل جیت کر تیسری پوزیشن حاصل کی۔ جبکہ لاڑکانہ کے محمد موسیٰ نے اوپن ویٹ میں گولڈ میڈل حاصل کیا، دوسری جانب ان مقابلوں کے دوران گولڈ اور سلور میڈل حاصل کرنے والے کھلاڑیوں کو صوبہ سندھ کی ٹیم میں شامل کیا جائے گا، جوکہ بعد ازاں قومی سطح کے کھیلوں میں حصہ لیں گے۔اس موقع پر خطاب کرتے ہوئے وائس چانسلر ڈاکٹر فتح مری نے کہا کہ سندھ زرعی یونیورسٹی میں کھیلوں کی ملکی سطح کا آغاز ہو چکا ہے۔زرعی یونیورسٹی گراؤنڈز اور اسپورٹس کمپلیکس سے تیار ہونے والے نوجوان کھلاڑی جلد ہی ملک کی نمائندگی کریں گے۔ تقریب سے میڈم افشین اختر، انوار حسین خانزادہ، آصف اقبال اور دیگرنے بھی خطاب کیا۔
