ہزاروں پاکستانی عمرہ زائرین کو شدید مشکلات ، 30 یا 40 ہزار کا ہوائی ٹکٹ اب ڈیڑھ لاکھ کا دیا جا رہا ہے۔

جدہ ( نمائندہ خصوصی) سعودی عرب میں موجود ہزاروں پاکستانی عمرہ زائرین کو شدید مشکلات سے دوچار کر دیا ہے، 30 یا 40 ہزار کا ہوائی ٹکٹ اب ڈیڑھ لاکھ کا دیا جا رہا ہے۔تفصیلات کے مطابق خلیجی خطے میں بڑھتی ہوئی جنگی صورتحال اور فضائی حدود کے مسائل کے باعث پروازوں کا شیڈول بری طرح درہم برہم ہو گیا ہے۔اس صورتحال نے سعودی عرب میں موجود ہزاروں پاکستانی عمرہ زائرین کو شدید مشکلات سے دوچار کر دیا ہے۔مکہ مکرمہ اور مدینہ منورہ میں موجود عمرہ زائرین کا کہنا ہے کہ وطن واپسی کی پروازیں منسوخ ہونے کے بعد نیا ٹکٹ ملنا تقریباً ناممکن ہو گیا ہے۔زائرین نے الزام عائد کیا ہے کہ ایئر لائنز اور ٹریول ایجنٹس اس مجبوری کا فائدہ اٹھا رہے ہیں اور ٹکٹوں کی من مانی قیمتیں وصول کی جا رہی ہیں۔مدینہ منورہ میں موجود زائرین نے بتایا کہ جو ہوائی ٹکٹ پہلے 30 سے 40 ہزار روپے کا تھا، اب اس کے لیے ڈیڑھ لاکھ روپے تک طلب کیے جا رہے ہیں۔پروازیں کینسل ہونے کی صورت میں ریفنڈ (رقم کی واپسی) کا کوئی واضح طریقہ کار نہیں بتایا جا رہا جبکہ ایجنٹس کی جانب سے زائرین کو ہراساں کرنے اور تنگ کرنے کی شکایات بھی سامنے آئی ہیں۔عمرہ زائرین نے حکومت پاکستان اور وزارت مذہبی امور سے مطالبہ کیا ہے کہ وہ اس سنگین صورتحال کا فوری نوٹس لیں۔زائرین کا کہنا ہے کہ ان کے پاس قیام و طعام کے اخراجات ختم ہو رہے ہیں، لہٰذا پاکستانی حکام ایئر لائنز سے رابطہ کر کے ان کی باحفاظت اور سستی وطن واپسی یقینی بنائیں۔