میانمار نے ای سگریٹ، ای شیشہ اور متعلقہ آلات کی درآمد، فروخت اور استعمال پر پابندی عائد کر دی

ینگون۔( نمائندہ خصوصی):میانمار نے ای سگریٹ، ای شیشہ اور ان سے متعلقہ آلات کی درآمد، فروخت اور استعمال پر پابندی عائد کر دی ہے۔ شنہوا کے مطابق میانمار کی وزارتِ صحت نے 18 فروری کو کابینہ کی منظوری سے حکم نامہ جاری کیا، جس کے تحت ای سگریٹ، الیکٹرانک شیشہ اور متعلقہ آلات کی درآمد، برآمد، فروخت، ملکیت، ذخیرہ، ترسیل، تقسیم اور استعمال مکمل طور پر ممنوع قرار دیا گیا ہے۔وزارت نے بتایا ہے کہ اس پابندی کا نفاذ ’’ایسنشل سپلائز اینڈ سروسز لا‘‘ کے تحت کیا جا رہا ہے۔ محکمہ صحتِ عامہ کے ڈپٹی ڈائریکٹر جنرل کیاؤ کان کاؤنگ نے کہا کہ ای سگریٹ نہ صرف میانمار بلکہ دیگر ممالک میں بھی نوجوانوں میں تیزی سے مقبول ہو رہے ہیں۔ انہوں نے کہا کہ بہت سے لوگ یہ سمجھتے ہیں کہ ای سگریٹ عام سگریٹ کے مقابلے میں کم نقصان دہ ہیں لیکن یہ تصور مکمل طور پر غلط ہے۔ان کے بقول ای سگریٹ پھیپھڑوں کو براہِ راست نقصان پہنچا سکتے ہیں اور ان میں انتہائی نشہ آور نکوٹین، بھاری دھاتیں اور دیگر زہریلے مادے شامل ہوتے ہیں۔ انہوں نے کہا کہ یہ پابندی عوامی صحت کے تحفظ، خصوصاً نوجوانوں کو بچانے کے لیے عائد کی گئی ہے۔