امریکا، بے گھر افراد کی مدد کیلئے قائم فلاحی ادارے کا سربراہ 23 ملین ڈالر کی خردبرد کے الزام میں گرفتار

لاس اینجلس۔(مانیٹرنگ ڈیسک):امریکی ریاست لاس اینجلس میں بے گھر افراد کی مدد کیلئے قائم فلاحی ادارے کے سربراہ کو فراڈ کے الزامات کے تحت گرفتار کر لیا گیا ہے جس پر الزام ہے کہ اس نے بے گھر افراد کی مدد کے لیے مختص سرکاری فنڈز میں سے 2 کروڑ 30 لاکھ امریکی ڈالر سے زائد رقم خردبرد کی اور اس رقم کا بڑا حصہ اپنی شاہانہ ذاتی زندگی پر خرچ کیا۔شنہوا کے مطابق فلاحی ادارے ابنڈنٹ بلیسنگز کے ایگزیکٹو ڈائریکٹر 42 سالہ الیگزینڈر سوفَر پر الزام ہے کہ اس نے ٹیکس دہندگان کی رقم کو پرتعیش سفری اخراجات، مہنگی ڈیزائنر شاپنگ، نجی سکولوں کی فیس اور جائیدادوں کی خریداری، جن میں یونان میں ایک تفریحی پراپرٹی بھی شامل ہے، کے لیے استعمال کیا۔الیگزینڈر سوفر کو سانتا اینا میں امریکی ڈسٹرکٹ کورٹ میں پیش کر دیا گیا ہے اور جرم ثابت ہونے کی صورت میں اسے 20 سال تک قید کی سزا کا سامنا کرنا پڑ سکتا ہے۔وفاقی استغاثہ کے مطابق ابنڈنٹ بلیسنگز کو 2018 سے 2025 کے دوران بے گھر افراد کے لیے مختص فنڈنگ کی مد میں 2 کروڑ 30 لاکھ ڈالر سے زائد رقم موصول ہوئی، اس میں سے 50 لاکھ ڈالر سے زائد رقم براہ راست لاس اینجلس ہوم لیس سروسز اتھارٹی سے ملی جبکہ 1 کروڑ 70 لاکھ ڈالر سے زائد رقم ایک اور غیر منافع بخش ادارے اسپیشل سروس فار گروپس انکارپوریٹڈ کے ذریعے فراہم کی گئی۔ابنڈنٹ بلیسنگز کو جنوبی لاس اینجلس کے مختلف مقامات پر 600 سے زائد بے گھر افراد کے لیے رہائش اور معاون خدمات فراہم کرنے کا معاہدہ دیا گیا تاہم تفتیش کاروں کے مطابق الیگزینڈر سوفر کے زیرانتظام بعض مقامات پر حالات معاہدے میں طے شدہ ذمہ داریوں سے کہیں کم تر تھے۔تفتیش کاروں کا الزام ہے کہ الیگزینڈر سوفر نے منظم انداز میں سرکاری فنڈز کے استعمال سے متعلق غلط بیانی کی اور انہیں ذاتی مقاصد کے لیے منتقل کیا۔امریکی محکمۂ انصاف کی جانب سے جاری پریس ریلیز کے مطابق اس نے عوامی رقوم کو اپنے ذاتی اکاؤنٹس میں منتقل کرنے کو چھپانے کے لیے جعلی بینک اسٹیٹمنٹس، انوائسز اور دیگر مالی دستاویزات تیار کیں۔کیلیفورنیا کے سینٹرل ڈسٹرکٹ کے فرسٹ اسسٹنٹ یو ایس اٹارنی بل ایسَیلی نے پریس کانفرنس میں کہاکہ وہ عیش و عشرت کی زندگی گزار رہا تھا جبکہ وہ لوگ جن کی خدمت اس کی ذمہ داری تھی، سڑکوں پر بغیر پناہ اور بغیر خوراک کے زندگی گزار رہے تھے۔انہوں نے کہاکہ روزانہ تین معیاری کھانے فراہم کرنے کے بجائے وہ صرف انسٹنٹ نوڈلز اور ایک مائیکروویو دے رہا تھا اور باقی رقم اپنی جیب میں ڈال رہا تھا۔ایف بی آئی کے لاس اینجلس فیلڈ آفس کے اسسٹنٹ ڈائریکٹر اکیل ڈیوس نے سوفَر پر الزام عائد کیا کہ اس نے شہر کے سب سے کمزور افراد کی ضروریات پر اپنی ذاتی لالچ کو ترجیح دی۔آئی آر ایس کریمنل انویسٹی گیشن لاس اینجلس فیلڈ آفس کے اسپیشل ایجنٹ انچارج ٹائلر ہیچر نے کہا کہ یہ کیس اس عزم کی عکاسی کرتا ہے کہ قانون نافذ کرنے والے ادارے ٹیکس دہندگان کی رقم کو ذاتی فائدے کے لیے استعمال کرنے والوں کو جوابدہ بنانے کے لیے پرعزم ہیں۔