چھتیس گھنٹے پہلے صدر ڈونلڈ ٹرمپ نے "تباہ و برباد” کرنے کی بات کی تھی۔ آج صبح انہوں نے "تعمیری بات چیت” کا ذکر کیا۔ ہر تاجر، سفارت کار اور جنرل اب یہی سوال پوچھ رہا ہے: ہفتے کی رات اور پیر کی صبح کے درمیان ایسا کیا ہوا جس نے پانسہ پلٹ دیا؟
چھ چیزیں بیک وقت ٹوٹ پھوٹ کا شکار ہوئیں۔ ان میں سے ایک بھی ایرانی نہیں تھی۔پہلا: اخراجات کا بل آ گیا۔ پینٹاگون نے 200 ارب ڈالر سے زائد کی اضافی فنڈنگ کی درخواست کر دی ہے۔ جنگ کی لاگت چھ دنوں میں 11.3 ارب ڈالر اور بارہ دنوں میں 16.5 ارب ڈالر رہی۔ 1.38 ارب ڈالر یومیہ کی رفتار سے بڑھتے ہوئے ان اخراجات کے لیے کانگریس کی مزاحمت اب ایک حقیقت ہے۔ 
وہ رقم جو "چند دنوں” کے لیے ہونی تھی، اب اسے ایسی ووٹنگ کی ضرورت ہے جو شاید کامیاب نہ ہو سکے۔دوسرا: فیڈرل ریزرو نے شرحِ سود میں کمی کی امیدیں ختم کر دیں۔ 18 مارچ کو فیڈرل ریزرو نے شرحِ سود کو 3.5 سے 3.75فیصد پر برقرار رکھا اور ایران جنگ کی وجہ سے توانائی کے بحران کو جواز بناتے ہوئے 2026 کے لیے مہنگائی (PCE) کی پیش گوئی 2.4 سے بڑھا کر 2.7 فیصد کر دی۔ وہ جنگ جسے طاقت کا مظاہرہ ہونا تھا، اب مہنگائی کا باعث بن رہی ہے۔
تیسرا: اتحادیوں نے بغاوت کر دی۔ بائیس ممالک نے آبنائے ہرمز پر تعاون کے معاہدے پر دستخط تو کیے، لیکن کسی نے بھی جنگی جہاز بھیجنے کا عہد نہیں کیا۔ جاپان اپنے تیل کے اسٹریٹجک ذخائر استعمال کر رہا ہے۔ جنوبی کوریا کا اسٹاک انڈیکس (Kospi) 12 فیصد گر چکا ہے۔ قطر کی ایل این جی (LNG) کی فراہمی بند ہونے اور پانچ سال تک کی ناگزیر تعطل کے اعلان کے بعد یورپ میں گیس کی قیمتیں 35 فیصد بڑھ گئیں۔چوتھا: TSMC نے خطرے کا سگنل دے دیا۔ تائیوان اپنی توانائی کا تقریباً 97 فیصد درآمد کرتا ہے۔ اس کے ایل این جی کے ذخائر صرف 11 دن کے لیے کافی ہیں۔ دنیا کی ایک تہائی ‘ہیلیم’ گیس قطر فراہم کرتا ہے 
جو TSMC کو چپس بنانے کے لیے درکار ہے۔ یہ ہیلیم اب ایک بند آبنائے کے پیچھے پھنس چکی ہے۔ این ویڈیا (Nvidia) کا ہر جی پی یو، ایپل کی ہر چپ اور ہر اے آئی (AI) کلسٹر کا دارومدار اب تائیوان کی اس فیکٹری پر ہے جس کے پاس گیس کی گنتی کے چند دن باقی ہیں۔ بڑی ٹیک کمپنیوں کی مالیت میں اربوں ڈالر کی کمی واقع ہوئی ہے کیونکہ توانائی کے بحران نے ٹیکنالوجی کے شعبے کو کچل دیا ہے۔پانچواں: بیرول نے نقصان کی نشاندہی کر دی۔ عالمی توانائی ایجنسی (IEA) کے سربراہ نے آج صبح آسٹریلیا کو بتایا کہ نو ممالک میں 40 توانائی کے اثاثے شدید متاثر ہوئے ہیں، عالمی تیل کی سپلائی میں یومیہ 11 ملین بیرل کی کمی آئی ہے، اور یہ بحران 1970 کی دہائی کے دونوں جھٹکوں سے بڑا ہے۔ انہوں نے کھاد اور ہیلیم کی سپلائی میں تعطل کا خاص ذکر کیا۔ عالمی توانائی کی حفاظت کے ذمہ دار شخص نے اس جنگ کو، جو ٹرمپ نے شروع کی تھی، جدید تاریخ کا بدترین توانائی بحران قرار دیا ہے۔
چھٹا: وسط مدتی انتخابات (Midterms)۔ پیٹرول کی قیمتوں میں 93 سینٹ فی گیلن کا اضافہ ہو چکا ہے۔ 66 فیصد امریکی اسے اپنی مرضی سے چھیڑی گئی جنگ قرار دے رہے ہیں۔ 60 فیصد اسے ناپسند کرتے ہیں اور 57 فیصد کا کہنا ہے کہ حالات خراب ہو رہے ہیں۔ واشنگٹن میں اہمیت بیرل کی نہیں، بلکہ ان ریاستوں کے ووٹوں کی ہے جہاں ووٹرز ہر منگل کو اپنی گاڑیوں کی ٹنکی بھرتے ہیں۔صدر ٹرمپ کو سفارت کاری کی اہمیت سمجھ آئی یا نہیں آئی، لیکن انہیں جنگی حساب کتاب سمجھ آگیا ہے۔ 
48 گھنٹوں کا الٹی میٹم ایک دھمکی تھی، لیکن 5 دن کا وقفہ ایک اعتراف ہے کہ اس دھمکی کے نتائج بھیانک ہوسکتے تھے۔ بجلی گھروں کی تباہی آبنائے ہرمز کو مستقل طور پر بند کر دیتی، خلیج کے پانی صاف کرنے والے پلانٹس اور توانائی کے بنیادی ڈھانچے کی تباہی کا سبب بنتی، سپلائی چین کو تباہ کرتی، مہنگائی کو 3 فیصد سے اوپر لے جاتی اور وسط مدتی انتخابات میں مخالفین کو جیت تھالی میں سجا کر پیش کر دیتی۔یہ حملہ روکنے کا عارضی فیصلہ تو حقیقت ہے، لیکن ریلیف نہیں۔ آبنائے ہرمز اب بھی بند ہے۔ 40 اثاثے اب بھی تباہ شدہ ہیں۔ کھاد کی سپلائی رکی ہوئی ہے۔ فصلوں کی بوائی کا وقت ختم ہو رہا ہے۔ پانچ دن کی گھڑی ٹک ٹک کر رہی ہے۔
