دنیا کی کوئی طاقت کشمیر کاز کو دبا نہیں سکتی، مریم اورنگزیب پاکستان کشمیری عوام کے ساتھ سیسہ پلائی دیوار کی طرح کھڑا ہے، وزیر اطلاعات

اسلام آباد(بیورورپورٹ ) وفاقی وزیر اطلاعات مریم اورنگزیب نے کہا ہے کہ پاکستان سات دہائیوں پر مشتمل کشمیری عوام کے آزادی کے سفر میں سیسہ پلائی دیوار کی طرح کھڑا ہے۔ دنیا کی کوئی طاقت کشمیر کاز کو دبا نہیں سکتی، یہ سفر کشمیر کی آزادی پر ہی منتج ہوگا۔ 27 اکتوبر کو یوم سیاہ کشمیر کے موقع پر خصوصی پیغام میں مریم اورنگزیب کا کہنا تھا کہ 75 سال قبل آج ہی کے دن سفاک بھارتی فورسز نے غیر قانونی طور پر مقبوضہ جموں و کشمیر پر قبضہ کرلیا تھا۔ مقبوضہ کشمیر میں ہر دس کشمیریوں پر ایک بھارتی فوجی مسلط ہے، پاکستان سات دہائیوں پر مشتمل کشمیری عوام کے آزادی کے سفر میں سیسہ پلائی دیوار کی طرح کھڑا ہے۔ انہوں نے کہا کہ کشمیری عوام کی جدوجہد آزادی میں جس طرح کشمیریوں نے قربانیاں دیں، اس کی مثال ملنا مشکل ہے، کشمیریوں نے ثابت کر دیا ہے کہ بھارت طاقت کے وحشیانہ استعمال سے ان کے جذبہ حریت کوکمزور نہیں کر سکتا۔ دنیا کی کوئی طاقت کشمیر کاز کو دبا نہیں سکتی، یہ سفر کشمیر کی آزادی پر ہی منتج ہوگا۔