قرض ادائیگی کے لئے آئی ایم ایف کو اظہار آمادگی کا خط بھیج دیا، آرڈیننس کے ذریعے نئے ٹیکس لگانے سے متعلق فیصلہ وزیر اعظم کریں گے ، مفتاح اسماعیل

اسلام آباد ( نمائندہ خصوصی) وزیرخزانہ مفتاح اسماعیل نے کہا ہے کہ پاکستان نے عالمی مالیاتی فنڈ(آئی ایم ایف ) کو اظہار آمادگی(لیٹر آف انٹینٹ ) کا خط دستخط کرکے بھیج دیا ہے۔ شوگرملز کو اضافی چینی برآمد کرنے کی اجازت سے متعلق سمری اقتصادی رابطہ کمیٹی میں آئے گی تو فیصلہ ہوگا۔ میڈیا سے گفتگو کرتے ہوئے انہو ں نے کہ پاکستان نے( آئی ایم ایف )کی جانب سے قرض کی ادائیگی کے لیے بھیجا گیا اظہار آمادگی( لیٹر آف انٹینٹ) دستخط کر کے واپس بھجوا دیا ہے،اظہار آمادگی کے خط پر میرے اورگورنراسٹیٹ بینک کے دستخط موجود ہیں۔آرڈیننس کے ذریعے نئے ٹیکس لگانے سے متعلق سوال پر وزیر خزانہ نے کہا اس بارے میں کوئی بھی فیصلہ وزیراعظم کریں گے۔ انہوں نے کہا کہ شوگرملز کو اضافی چینی برآمد کرنے کی اجازت سے متعلق سمری اقتصادی رابطہ کمیٹی میں آئے گی تو فیصلہ ہوگا،ہمیں برآمدات پر توجہ دینا ہو گی،چاول،گندم، گنا اور کپاس میں پاکستان بھارت اور چین سے پیچھے ہے جبکہ پاکستان میں آبادی 2.4 فیصد کے تناسب سے بڑھ رہی ہے۔پاکستان میں پانی کی دستیابی بھی ایک بڑا مسئلہ ہے۔ انہوں نے کہا کہ ساڑھے 4 ارب ڈالرز کا پام آئل خریدا ہے جبکہ رواں سال 450 ملین ڈالرز کی گندم درآمد کی جا چکی ہے۔