پاک بحریہ اور پاکستان کوسٹ گارڈز کی مشترکہ انسداد امنشیات کارروائی 1,500 کلوگرام چرس اور 500 کلوگرام آئس ضبط

کراچی( نمائندہ خصوصی)، انٹیلی جنس پر مبنی مشترکہ انسداد منشیات آپریشن میں پاک بحریہ اور پاکستان کوسٹ گارڈز نے جوائنٹ میری ٹائم انفارمیشن کوآرڈینیشن سینٹر کے تعاون سے گوادر کے ساحلی علاقے پشوکان میں کارروائی کے دوران تقریباً 1,500 کلوگرام چرس اور 500 کلوگرام آئس ضبط کر لی۔ ضبط کی گئی منشیات کی بین الاقوامی مارکیٹ میں مالیت تقریباً 215 ملین امریکی ڈالر ہے۔منشیات کی یہ کھیپ بحیرۂ عرب کے راستے بین الاقوامی مقامات پر اسمگل کی جا رہی تھی۔ ضبط شدہ منشیات مزید قانونی کارروائی کے لیے پاکستان کوسٹ گارڈز کے حوالے کر دی گئی ہیں۔یہ کامیاب کارروائی انسدادِ اسمگلنگ میں متعلقہ اداروں کے مابین مؤثر تعاون اور ہم آہنگی کو نمایاں کرتی ہے اور پاک بحریہ کے اس غیر متزلزل عزم کی بھی عکاس ہے کہ ملکی سمندری حدود کو کسی بھی غیر قانونی سرگرمی کے لیے استعمال نہیں ہونے دیا جائے گا۔